अमेरिकाले नेपाली आप्रवासीको टीपीएस खारेज गर्ने निर्णय

२३ जेठ, वासिङ्टन । अमेरिकी ट्रम्प प्रशासनले नेपाली आप्रवासीलाई दिँदै आएको टेम्पररी प्रोटेक्टेड स्ट्याटस (टीपीएस) सुविधा २०२५ अगस्ट ५ मा अन्त्य हुने गरी खारेज गर्ने घोषणा गरेको छ । अमेरिकी नागरिकता तथा आप्रवासन सेवाले बिहीबार एक संक्षिप्त विज्ञप्तिमार्फत नेपाली टीपीएस धारकहरूलाई आफ्नो स्वदेश फिर्तीको तयारी गर्न आग्रह गरेको हो ।

यूएससीआईएसका अनुसार, नेपालले २०१५ को विनाशकारी भूकम्पपछि प्राप्त टीपीएस सुविधा अब निरन्तर आवश्यक नरहेको बताइएको छ । ‘नेपालले आपतकालीन अवस्थामा सुधार ल्याएको, पूर्वाधार पुनर्निर्माणमा उल्लेखनीय प्रगति गरेको’ भन्दै अब टीपीएसको आवश्यकता नरहेको निष्कर्ष निकालिएको हो ।

सेप्टेम्बर २०२४ को एक प्रतिवेदनलाई उद्धृत गर्दै गृह सुरक्षा विभागले नेपालमा ध्वस्त भएका घरहरूको ८८ प्रतिशत पुनर्निर्माण भइसकेको जानकारी दिएको छ । त्यसैले, नेपालले आफ्ना नागरिकहरूको पुनःस्थापनामा पर्याप्त तयारी गरेको ठहर गर्दै टीपीएस समाप्त गर्ने निर्णय लिइएको बताइएको छ ।

नेपाललाई टीपीएस सुविधा पहिलोपटक २०१५ जुनमा, विनाशकारी भूकम्पपछि दिइएको थियो । सुरुमा १८ महिनाका लागि दिइएको यो सुविधा, तत्कालीन राष्ट्रपति ओबामाको कार्यकालमा २०१६ अक्टोबरमा विस्तार गरिएको थियो ।

तर २०१८ मा ट्रम्प प्रशासनले यो सुविधा हटाउने प्रयास गरेको थियो । इमिग्रेशन अधिवक्ताहरूको कानुनी चुनौतीपछि उक्त निर्णय तत्काल कार्यान्वयन हुन सकेन र टीपीएस सन् २०२२ सम्म लम्बिएको थियो ।

पछिल्लो चरणमा, बाइडेन प्रशासनले पनि दुई पटक टीपीएसको अवधि थप गरेको थियो, जुन अब २०२५ जुन २४ मा अन्त्य हुने बताइएको थियो । तर, बिहीबार गृह सुरक्षा सचिव क्रिस्टी नोएमको निर्णयपछि टीपीएस २०२५ अगस्ट ५ मा अन्तिमरूपमा समाप्त हुने निश्चित भएको हो ।

यूएससीआईएसले अमेरिकामा टीपीएस अन्तर्गत रहेका झण्डै ७ हजार ५ सय नेपाली आप्रवासीलाई ‘स्वतः स्वदेश फिर्तीको प्रक्रिया’ सुरु गर्न आग्रह गरेको छ । यसका लागि उनीहरूलाई CBP One एपमार्फत स्वयं निर्वासन प्रक्रिया थाल्न सुझाव दिइएको छ ।

अमेरिकी विदेश विभागले नेपाललाई हाल ‘यात्रा सतर्कता स्तर २’ मा राखेको छ, जुन देशको राजनीतिक अस्थिरता तथा सम्भावित हिंसाका कारण हो ।