यूरोपमा टेस्लाको विक्री ५० प्रतिशतले घट्यो

१५ जेठ, बेलायत । युरोपमा विद्युतीय सवारी साधनहरूको खरीदहरू बढ्दै गइरहेको भए पनि टेस्लाको बिक्री भने घट्दै गइरहेको रिपोर्ट गरिएको छ।

मासिक बिक्री तथ्याङ्क अनुसार अप्रिलमा बेलायत, नेदरल्याण्ड्स, डेनमार्क र पोर्चुगलका साथै स्वीडेन र फ्रान्समा टेस्लाको बिक्री उल्लेखनीय रूपमा घटेको टेलिग्राफले उल्लेख गरेको छ।

संयुक्त राज्य अमेरिकामा जस्तै, टेस्लाका सीईओ इलन मस्कको नीतिले युरोपभरि प्रतिक्रिया र विरोधलाई प्रेरित गरेको बताइएको छ।
मस्कले जर्मनी र बेलायतमा धेरै अति–दक्षिणपन्थी राजनीतिक उम्मेदवारहरूलाई समर्थन गरेको बताइएको छ।

त्यसका साथै ट्रम्प प्रशासनमा मस्कको उच्च–प्रोफाइल भूमिकालाई ध्यानमा राख्दै, युरोपेली आयातहरूमा उच्च शुल्क लगाउने धम्कीप्रतिको क्रोधले पनि केही युरोपेली खरीदकर्ताहरूलाई टाढा धकेलिरहेको हुन सक्ने उल्लेख गरिएको छ।

युके अटोमोटिभ उद्योग व्यापार समूह एसएमएमटीका अनुसार, टेस्लाले पहिलो त्रैमासिकमा बलियो बिक्री रिपोर्ट गरेको केही युरोपेली बजारहरू मध्ये एक बेलायतमा अप्रिलको बिक्रीमा ६२ प्रतिशतले गिरावट आएको उल्लेख छ।

यस महिनाको लागि बेलायतमा समग्र विद्युतीय सवारी साधनको बिक्री ८ प्रतिशतले बढे पनि टेस्लाको बिक्रीमा भने गिरावट आएको बताइएको छ।

त्यसैगरी ती प्रत्येक देशका व्यापार समूहहरूको तथ्याङ्क अनुसार डेनमार्कमा ६७ प्रतिशत, नेदरल्याण्ड्समा ७४ प्रतिशत र पोर्चुगलमा ३३ प्रतिशतले टेस्लाको बिक्री घटेको रिपोर्ट गरिएको छ।

यस बाहेक स्वीडेनमा ८१ प्रतिशत र फ्रान्समा ५९ प्रतिशतले बिक्री घटेको रोयटर्स उल्लेख गरेको छ।