Advertisement
११ जेठ, काठमाडौं । सरकारले सगरमाथा दिवसको अवसर पारेर सगरमाथाको सफल आरोहण गर्ने आरोहीलाई पर्यटक प्रवर्द्धक नियुक्त गर्ने भएको छ ।
संस्कृति, पर्यटन तथा नागरिक उड्डयन मन्त्रालयले सूचना प्रकाशित गर्दै यसबारे जानकारी गराएको छ ।
७१औं अन्तर्राष्ट्रिय सगरमाथा दिवस (२९ मे) का दिन आरोहीहरूलाई पर्यटक प्रवर्द्धक नियुक्त गर्ने तयारी गरिएको हो ।
पर्यटन प्रवर्द्धकसम्बन्धी कार्यविधि-२०७९ अनुसार १५ फागुन २०८० का दिन नियुक्त भएका देश/प्रान्त/सहरमा बाहेक अन्य स्थानमा पर्यटन प्रवर्द्धक नियुक्त गरिने समेत मन्त्रालयले जनाएको छ ।
मन्त्रालयले सर्त तोक्दै सो सर्त पूरा भएका आरोहीबाट आवेदन समेत मागेको छ ।
मन्त्रालयका अनुसार २१ वर्ष पूरा भएको नेपाली वा गैरआवासीय नेपाली र विदेशी नागरिकले समेत यसका लागि आवेदन दिन सक्ने छन् ।
पर्यटनसम्बन्धी व्यापार, पेसामा कम्तीमा ७ वर्षदेखि आवद्ध भएर ख्याती प्राप्त गरेको हुनुपर्ने समेत सर्त राखिएको छ ।
नैतिक पतन हुने गरी फौजदारी अभियोगमा सजाय नपाएको र कुनै देशमा शरणार्थीको रुपमा नरहेको हुनुपर्ने समेत विभागले जनाएको छ ।
Comments
