कतारका राजा आज नेपाल आउँदै, राष्ट्रपतिले विमानस्थलमै स्वागत गर्ने, सरकारले दियाे सार्वजनिक बिदा
Advertisement
११ बैशाख, काठमाडौँ । आज कतारका राजा नेपाल आउँदैछन् । मंगलबार साँझ ५ः३५ मा काठमाडौं आइपुग्ने कतारका अमिर (राजा) शेख तमिम बिन हमाद अल थानीको नेपाल भ्रमणलाई सफल पार्न सरकारी संयन्त्रहरू आवश्यक तयारीमा जुटेका छन् ।
कूटनीतिक सम्बन्ध स्थापना भएको ४७ वर्षपछि कतारबाट उच्चस्तरीय भ्रमण हुन लागेको हो । पहिलोपटक नेपाल भ्रमणमा आउन लागेका कतारी अमिरलाई राष्ट्रपति रामचन्द्र पौडेलले अन्तर्राष्ट्रिय विमानस्थलमै स्वागत गर्ने जनाइएको छ ।
कतारबाट पहिलोपटक उच्चस्तरीय भ्रमण हुन लागे पनि नेपालबाट भने पटकपटक उच्चस्तरीय भ्रमण भइसकेका छन् । सबैभन्दा पहिला प्रधानमन्त्री गिरिजाप्रसाद कोइरालाले १९९८ मा कतारको भ्रमण गरेका थिए । त्यसपछि २००५ मा तत्कालीन राजा ज्ञानेन्द्र शाहले कतारको भ्रमण गरेका थिए भने राष्ट्रपति रामवरण यादव र राष्ट्रपति विद्यादेवी भण्डारीले पनि कतारको भ्रमण गरेकी थिइन् ।
अमिरको भ्रमणका अवसरमा गरिने सम्झौता तथा समझदारीका लागि परराष्ट्र मन्त्रालयले तयारी गरिरहेको परराष्ट्र मन्त्रालयका प्रवक्ता अमृत राईले बताए । उनले कतारसँग गरिने सम्झौता तथा समझदारीपत्रमा हस्ताक्षरबारे तयारी भइरहेको जानकारी दिएका छन् ।
राष्ट्रपति रामचन्द्र पौडेलले मंगलबार बेलुका रात्रिभोजको आयोजना गर्नेछन् । बुधबार प्रधानमन्त्री पुष्पकमल दाहाल र कतारी अमिरबीच द्विपक्षीय वार्ता हुनेछ । सो वार्ताका क्रममा केही सम्झौता तथा समझदारीपत्रमा हस्ताक्षर हुनसक्नेसमेत जनाइएको छ । यसैबीच कतारका राजाकाे नेपाल भ्रमणकाे अवसरमा सरकारले आज देशभर सार्वजनिक बिदा दिएकाे छ । सरकारकाे याे निर्णयकाे भने सामाजिक संजालमा व्यापक विराेध भइरहेकाे छ ।
Comments
