Advertisement
१८ वैशाख, एजेन्सी। सोमबार लण्डनको किंग स्ट्रीटमा ठूलो लिलामी हुँदैछ। यसमा विश्वका पुराना गहना बिक्रीका लागि राखिनेछ । यो लिलामी बेलायतको लिलामी घर क्रिस्टीजले गर्न लागेको हो ।
न्यूयोर्क टाइम्सको रिपोर्टका अनुसार यस लिलामीमा विश्वको सबैभन्दा पुरानो हीरा ‘ब्रोलिटी अफ इन्डिया’ पनि समावेश हुनेछ। यसको मूल्य ६३ करोड भारतीय रूपैयाँ छ। लिलामीबाट प्राप्त रकम समाज कल्याणका काममा खर्च हुने बताइएको छ ।
लण्डनमा हुने यो लिलामीलाई विश्वकै सबैभन्दा ठूलो गहना लिलामीको रुपमा लिइएको छ । यसमा ७०० गहनाहरू समावेश हुनेछन्। यी गहनाहरू हेइडी होर्टन नामकी अस्ट्रियाली महिलाका हुन्। जसको गत वर्ष मृत्यु भएको थियो ।
हेइडीका पति हेल्मुट होर्टन जर्मनीका अर्बपति थिए। हेइडीले सबै गहनाहरू उनीबाट पाएकी थिइन्। हेल्मुट होर्टनले दोस्रो विश्वयुद्धको समयमा यहूदीहरूबाट जबरजस्ती खरिद गरिएका सामानहरूमा आफ्नो व्यवसाय निर्माण गरेको आरोप छ।
डेभिड डे जोङ नामक लेखकले नाजी अर्बपतिहरूमाथिको आफ्नो पुस्तकमा दोस्रो विश्वयुद्धमा युरोपका यहूदीहरूबाट जबरजस्ती उनीहरूको व्यवसाय किनिएको बताएका छन्। यो काम दुई चरणमा गरिएको थियो। १९३८ अघि र पछि। हेल्मुट होर्टन दुबैमा धेरै सक्रिय थिए।
१९३८ भन्दा पहिले, यहूदीहरूमा डर पैदा गरेर उनीहरूको व्यवसाय किनिएको थियो र पछि उनीहरू आफ्नो व्यवसाय बेच्न बाध्य भए। आफ्नो ज्यान जोगाउन यहूदीहरूले आफ्नो व्यवसाय, पसल र सामानहरू निकै कम मूल्यमा बेचेर जर्मनी छोडे।
ब्रिटिस भोगका अनुसार ९०.८ क्यारेटको ‘ब्रोलिटी अफ इन्डिया’ हीरा कोहिनूरभन्दा पुरानो मानिन्छ। यो पहिलो पटक १२ औं शताब्दीमा उल्लेख गरिएको थियो। इतिहासकारहरूका अनुसार, यसको पहिलो मालिक १२ औं शताब्दीमा फ्रान्सकी रानी, एक्विटेनको एलेनोर भनिन्छ। यो रंगहीन हीराको उत्पत्ति आन्ध्र प्रदेशमा भएको मानिन्छ ।
धेरै वर्षसम्म लुकाएर राखेपछि यो हीरा सन् १९५० मा न्युयोर्कका हेनरी विन्स्टनले भारतका राजाबाट किनेका थिए । यसपछि सन् १९७१ मा यो हीरा हेल्मुट होर्टेनले किनेका थिए ।
Comments
