Advertisement
२७ कार्तिक, काठमाडौं । काठमाडौं-७ बाट प्रतिनिधिसभामा स्वतन्त्र उम्मेदवारी दिएका रामबीर मानन्धरले आगामी निर्वाचन जित्ने दाबी गरेका छन् । यही क्षेत्रबाट दुई पटकसम्म सांसद र एक पटक मन्त्री भइसकेका उनलाई नेकपा एमालेले टिकट नदिएपछि उनी स्वतन्त्र उम्मेदवार बनेका हुन् ।
एमालेका अत्यन्तै लोकप्रिय नेताका रुपमा चिनिएका उनले एमालेले आफूलाई टिकट नदिएर पार्टीमाथि घात गरेको आरोप लगाएका छन् । ‘एमालेले मलाई टिकट दिएको भए एक सिट बढी जित्थ्यो, जसले अहिले टिकट पाए उनले हारेपछि त एमालेलाई घाटा भयो नि’ उनले भने ‘ एमाले अध्यक्ष केपी शर्मा ओलीको यस्तै अदूरदर्शी निर्णयका कारण आगामी निर्वाचनमा एमाले टर्च लाइट बालेर खोज्नुपर्ने अवस्था आउन सक्छ ।’
उनले ‘घण्टाघर’ चुनाव चिन्ह पाएका छन् । सामान्य स्वाभावका उनी आफ्नो सरलता र स्पष्ट कुरा गर्ने शैली नै निर्वाचन जित्ने प्रमुख आधार भएको बताउँछन् । ‘म त सबै मतदाताको साझा उम्मेदवार हुँ, मैले उम्मेदवारी दिएपछि धेरैतिरबाट सकारात्मक ‘रेस्पोन्स’ आएको छ’ उनले भने ‘ यो बेला भनेको मतदाताले सही प्रतिनिधि छानेर ५ वर्षसम्म यो क्षेत्रको विकासमा सहयोग गर्ने हो त्यसैले पनि अब कसलाई मतदान गर्नुपर्छ भन्नेमा कोही पनि अलमलमा पर्नुहुन्न भन्ने लाग्छ ।’
उनले मुख्यगरी ७ वटा प्रतिबद्धता व्यक्त गरेका छन् । उनले प्राविधिक शिक्षा र गुणस्तरीय स्वास्थ्य, महिला सशक्तिकरण, खेलकुद तथा सीप विकास, सांस्कृतिक सम्पदाको संरक्षण, सडक र वातावरण व्यवस्थापन, उद्यमशीलता विकास र युवा रोजगारी, स्थानीय कृषि तथा लघु उद्योग प्रोत्साहन, अधुरा रहेका विकासक पूर्वाधारहरुलाई पूरा गर्ने प्रतिबद्धता व्यक्त गरेका छन् ।
उनले आफू सांसद रहँदा गरेका विकास निर्माणका योजनालाई जनतामाझ पुस्तक नै प्रकाशन गरेर सार्वजनिक गरेका छन् । ‘मैले बजेट बिनियोजन गर्ने सन्दर्भमा कुनै अनियमितता गरेको छैन, कसैले त्यस्तो भेट्यो भनें म राजनीति छोडिदिन्छु’ मानन्धरले भने । उनी अरु कुनै उम्मेदवारको विषयमा आलोचना नगर्ने बताउँछन् । उनले एमाले अध्यक्ष ओलीले पार्टी बिगारेको आरोप लगाएका छन् । ओलीले क–कसलाई कसरी टिकट दिए सबै पोल खोलिदिने उनी बताउँछन् ।
‘घण्टाघर’ चिन्हमा मतदान गर्ने विषयमा मतदाता सचेत रहेको उनले बताए। उनीसँग राजनीतिक दलका र स्वतन्त्र गरी २८ जना प्रतिस्पर्धामा छन्। २०४९ र २०५४ सालमा काठमाडौं महानगरपालिका वडा नम्बर १६ का वडाध्यक्षसमेत भइसकेका उनी आफूले त्यतिबेला गरेको कामलाई मतदाताले अझै पनि सम्झिइरहेको बताएका छन् ।
यो क्षेत्रमा काठमाडौं महानगरपालिकाका १६, १७, १८, २५ र तारकेश्वर नगरपालिकाका ३, ४ र ५ र नागार्जुन नगरपालिकाका १, २ र ३ वडा पर्छन् । यो क्षेत्रमा झण्डै ६० हजार मतदाता रहेका छन् । यो क्षेत्रमा माओवादी पीडित मतदाता धेरै रहेकाले गठबन्धनको तर्फबाट साझा उम्मेदवार बनेकी मानुषी यमी भट्टराइलाई जनताले मतदान नगर्ने उनले बताए । यो क्षेत्रमा एमालेले श्याम घिमिरेलाई टिकट दिएको छ।
मल्टिमिडिया ग्यालरी
Comments
