Advertisement
०६ जेठ, काठमाडाैं । शुभविवाहको प्रिती भोजको निमन्त्रणा मान्न पुग्नु भएका विशिष्ट पाहुनाले बेहुलाका पितालाई बधाई दिनुभयो । दुवैले एक अर्कामा आलिङ्गन गरेर आत्मियता प्रदर्शन भयो । त्यो मिलनको क्षण बेहुलाका पितालाई विशेष दर्शनीय थियो ।
त्यहाँ पछि वहाँ वर-वधुको रिसेप्शनमा जानु भयो । वहाँले वर- वधुलाई सामान्य हात जोरेर सुखमय भावी जीवनको शुभकामना दिनु भयो र आफ्नो परिचय दिनु भयो । केही क्षण सँगै बस्नु भयो, बेहुलाका पिता तर्फ आउनु भयो र आफू विदा माग्दै गरेको सङ्केत गर्नुभयो । बेहुलाका पिताले ती पाहुनालाई भन्नु भयो, – मित्र, तपाईंले ती वर वधुलाई कुनै यस्तो वरदान गर्नुहोस्, जुन वर तिनले सदाका लागि गाँठो पारेर राखुन् । त्यो वर उनिहरूका लागि अविश्मरणीय होस् । यति आग्रह सुनिसके पछि आगन्तुक सरासर रिसेप्शनमा जानु भयो र वहाँले वरलाई एक शयको नयाँ नोट हातमा थमाउन दिनु भयो र भन्नु भयो, – दुलाहा साप! ल यो नोट कच्याक कुचुक पारेर तपाईंले सकेको दूरिमा पुग्ने गरी हुर्याउनु होस् ।
बेहुलाले एक पटक पाहुनाको मुहार हेरे र भने, – ठुलो बा! यो मैले समाएको धनलक्ष्मी हो । यो तपाईंले मलाई कोशेली दिनुभयो । म यसलाई जतनले राख्छु । धनलक्ष्मीलाई पनि कसैले फ्याँक्छ ? म त्यसो गर्न सक्दिन ।
आगन्तुकले आफ्नो कान समाउँदै बेहुलालाई भन्नुभयो, – बाबु! तपाईंले समाएको एकशयको नोट धनलक्ष्मी हो भने तपाईंको साइडमा रहेकी जन-लक्ष्मी हुन् । जसरी तपाईंले कागजबाट निर्मित धन लक्ष्मीको भारलाई आत्मियताको तराजुले तुलना गर्नुभयो र उच्चस्थान दिनुभयो, त्यस्तै गरी यी जन लक्ष्मी पनि सर्वगुण सम्पन्न होलिन् । उनको आकार र भौतिक सजावत भन्दा आत्मियतालाई कदर गर्नुहोस् । यिनी त अग्नि, मातृका, ध्रुवतारा, हजुरबा र सन्निकट कुलाचारलाई साक्षी राखेर हर्ष बढाईका साथ भित्र्याइएकी, कहिले पनि यिनको महत्त्वलाई अवमूल्यन नगर्नुहोस् । समाजमा जसरी तपाईंको उपस्थिति महत्त्वपूर्ण थियो, अब तपाईं दुइको एकै साथ उपस्थितिले मात्र त्यो सर्वगुण सम्पन्नतामा परिणत हुन्छ । यी जनलक्ष्मीलाई समुद्रदेवले तपाईं योग्य बनाई यहाँसम्म ल्याउन गरेको मेहनतको पनि तपाईंको ब्रह्मले कदर गर्नुहोस् । तपाईंको जय होस् ।
बेहुलाका पिताले यस्तै सोचेका थिए । मित्र त उनको मनको भाव बुझ्ने रहेछन्, उनी दङ्ङ परे ।
हरि: ॐ !!
Comments
