Advertisement
०१ जेठ, काठमाडौं । रुसी राष्ट्रपति भ्लादिमिर पुटिनले फिनल्यान्डले तटस्थ हैसियत त्यागेर नेटोमा जाेडिनु ‘भुल’ हुने चेतावनी दिएका छन् । उनले आफ्ना फिनिस समकक्षीलाई यस्तो चेतावनी दिएका हुन् ।
पुटिनले फिनिस राष्ट्रपति साउली निनिस्तोलाई फिनल्यान्डको सुरक्षामा कुनै खतरा नभएको बताए ।
फिनल्यान्डले नेटोमा सहभागी हुन छिट्टै औपचारिक घोषणा गर्ने अपेक्षा गरिएको पूर्वसन्ध्यामा दुई नेताबीच टेलिफोनमा कुराकानी भएको हो । फिनल्यान्डका राष्ट्रपतिले पुटिनलाई फोन गरेका थिए ।
फिनल्यान्डको १,३०० किलोमिटर सिमाना रुससँग जोडिएको छ । हालसम्म आफ्नो पूर्वी छिमेकीसँगको शत्रुताबाट जोगिन फिनल्यान्ड नेटोबाट बाहिरै रहेको छ ।
फिनल्यान्डसँगै स्वीडेनले पनि नेटोमा सहभागी हुने इच्छा व्यक्त गरेको छ ।
पुटिनले फिनल्यान्डको कदमको बदला लिने कुनै खास धम्की दिएनन्, तर रुसी विदेश मन्त्रालयले जवाफी कारबाही हुने संकेत गरेको छ ।
फिनल्यान्डमा विद्युत आपूर्ति निलम्बन गर्ने रुसको निर्णयलाई प्रारम्भिक संकेतको रूपमा हेरिएको छ । रुसी उर्जा आपूर्तिकर्ता आरएओले आफ्नो विज्ञप्तिमा भुक्तानीमा समस्या देखिएको उल्लेख गरेको छ ।
फिनल्यान्डले रुसी निलम्बनले कुनै समस्या नपरेको बताएको छ । फिनल्यान्डकी राष्ट्रिय ग्रिड कार्यकारी रेमा पायभिनेनले रुसी आयातले आपूर्तिको करिब १० प्रतिशत ओगटेको र वैकल्पिक स्रोतबाट प्रतिस्थापन गर्न सकिने बताए । बीबीसी
Comments
