मेस्सीबिनाको पहिलो खेलमै अर्जेन्टिना पराजित, उरुग्वेसँग २-१ ले स्तब्ध

२८ कात्तिक, काठमाडौँ । कप्तान लियोनल मेस्सीबिनाको पहिलो खेलमै अर्जेन्टिना पराजित भएको छ। शनिबार बिहान भएको अन्तर्राष्ट्रिय मैत्रीपूर्ण फुटबल खेलमा उरुग्वेले अर्जेन्टिनालाई उसकै घरेलु मैदानमा २–१ गोलले पराजित गरेको हो।

शनिबार बिहान सम्पन्न खेलमा उरुग्वेले अर्जेन्टिनाको घरेलु मैदान ला बोम्बोनेरामा जित निकालेको हो। पहिलो हाफ गोलरहित बराबरीमा सकिएको खेलको दोस्रो हाफमा तीन गोल भएका थिए।

खेलको ४८औँ मिनेटमा अर्जेन्टिनाका डिफेन्डर लियोनार्दो बालेरडीले आत्मघाती गोल गरेपछि उरुग्वेले अग्रता लिएको थियो। त्यसको पाँच मिनेटपछि अर्थात् ५३औँ मिनेटमा म्याक्सिमिलियानो अराउजोले गोल गर्दै उरुग्वेको अग्रता दोब्बर बनाए।

खेलको ७३औँ मिनेटमा जुलियन अल्भारेजले अर्जेन्टिनाका लागि एक गोल फर्काए पनि टोलीलाई हारबाट जोगाउन सकेनन्।

खेलमा अर्जेन्टिनाले ७२ प्रतिशत बल पोसेसन राख्दै उरुग्वेमाथि दबाब बनाए पनि त्यसलाई गोलमा परिणत गर्न सकेन। अर्जेन्टिनाले १८ प्रहार गर्दा ६ प्रहार पोस्टको दिशामा गरेको थियो। उरुग्वेले भने चार प्रहारमध्ये तीनलाई पोस्टको दिशामा राखेको थियो।

२१ वर्ष लामो अर्जेन्टिनासँगको यात्रालाई मेस्सीले यसै वर्ष संन्यास लिएर पूर्णविराम दिइसकेका छन् । मेस्सीबिनाको मैदानमा उत्रिएको अर्जेन्टिनाले बलमाथि नियन्त्रण राखे पनि नतिजा आफ्नो पक्षमा पार्न सकेन।