फ्रान्समा महँगी र शिक्षा प्रणालीविरुद्धको प्रदर्शन हिंसात्मक, १२०० भन्दा बढी पक्राउ

०१ कार्तिक, काठमाडौँ । फ्रान्समा शिक्षा प्रणालीको अवस्था सुधार र बढ्दो महँगीविरुद्ध शनिबार भएको प्रदर्शन हिंसात्मक बनेको छ । बिबिसिमा उल्लेख भए अनुसार प्रदर्शनमा सहभागी हुनेको संख्या करिब ५ लाख ५० हजार रहेको अनुमान गरिएको छ भने प्रहरीले कम्तीमा १ हजार २०० जनालाई पक्राउ गरेको फ्रान्सेली सरकारले जनाएको छ ।

प्रदर्शनका क्रममा राजधानी पेरिससहित विभिन्न सहरमा प्रहरी र प्रदर्शनकारीबीच झडप भएको थियो । प्रहरीले भीड नियन्त्रण गर्न अश्रुग्यास र पानीको फोहोरा प्रयोग गरेको थियो । हिंसात्मक घटनामा १५० जना प्रहरी घाइते भएको प्रधानमन्त्री सेबास्टियन लेकोर्नुले बताएका छन् ।

पेरिसमा प्रदर्शनका क्रममा सवारीसाधन र भवनमा आगजनी गरिएको थियो भने पसल तथा व्यवसायमा तोडफोड र लुटपाट भएको थियो । त्यस्तै, लिमोज सहरको नगरपालिकाको भवनमा लागेको आगोका कारण छानाको केही भाग भत्किएको स्थानीय अधिकारीहरूले बताएका छन् ।

लियोन सहरमा पर्यटक सूचना केन्द्रमा आगजनी भएपछि नगरप्रमुख ग्रेगरी डुसेले घटनालाई सहरका लागि दुःखद बताएका छन् । सेन्ट–एटिएनमा ग्रिनेड विस्फोटका कारण एक युवकको हातमा गम्भीर क्षति पुगेको सहरका नगरप्रमुखले बताएका छन् ।

फ्रान्सको आन्तरिक मन्त्रालयका अनुसार पेरिस, मार्से, रेनेस, टुलुज र आन्जेसलगायतका सहरमा नकाबधारी समूहले लक्षित रूपमा हिंसात्मक गतिविधि गरेका थिए । लिल सहरमा रहेको एप्पल स्टोरमा समेत तोडफोड गरी सामान लुटिएको जनाइएको छ ।

फ्रान्सका माध्यमिक विद्यालयहरूमा शिक्षक तथा कर्मचारीको अभाव र जीर्ण भौतिक संरचनाको विरोधमा पछिल्ला सातादेखि विद्यार्थीहरूले प्रदर्शन गर्दै आएका छन् । शनिबारको प्रदर्शनमा ट्रेड युनियन तथा बढ्दो जीवनयापन खर्चविरुद्ध आन्दोलन गर्दै आएको ‘येलो भेस्ट’ समूहका सदस्यसमेत सहभागी भएका थिए ।

फ्रान्समा बढ्दो महँगी र सार्वजनिक सेवाको अवस्थालाई लिएर भएको प्रदर्शन आगामी राष्ट्रपतीय निर्वाचनको राजनीतिक वातावरणसँग पनि जोडिएको छ । राष्ट्रपति इम्यानुएल म्याक्रोंले आगामी वर्ष पद छाड्ने तयारी गरिरहेका बेला देशमा राजनीतिक अनिश्चितता बढिरहेको छ ।

प्रधानमन्त्री लेकोर्नुले हिंसाको माध्यमबाट कसैले पनि आफ्नो राजनीतिक एजेन्डा अघि बढाउन नसक्ने बताएका छन् । राष्ट्रपति म्याक्रोंले सरकारी कार्यालय, व्यवसाय र नगरपालिकामा तोडफोड तथा लुटपाट गर्नेहरूलाई कानुनी कारबाही गरिने चेतावनी दिएका छन् ।

सरकारले विद्यालयमा शिक्षक अभाव कम गर्न ३ हजार अतिरिक्त अस्थायी शिक्षक उपलब्ध गराउने प्रतिबद्धता जनाए पनि प्रदर्शन रोकिएको छैन । बरु पछिल्ला दिनमा आन्दोलन थप चर्किएको छ ।