पेन्टागनद्वारा युक्रेनलाई टोमाहक मिसाइल दिन सिफारिस, अन्तिम निर्णय ट्रम्पको हातमा

१५ कात्तिक, वासिङ्टन डिसी । पेन्टागनले युक्रेनलाई लामो दूरीका टोमाहक मिसाइलहरू उपलब्ध गराउन ह्वाइट हाउसलाई ग्रिन सिग्नल दिएको छ। रक्षा मन्त्रालयको मूल्याङ्कनअनुसार यसो गर्दा अमेरिकाको आफ्नै हतियारको भण्डारमा नकारात्मक असर नपर्ने देखिएको छ।

अब यससम्बन्धी अन्तिम राजनीतिक निर्णय राष्ट्रपति डोनाल्ड ट्रम्प को हातमा रहेको छ। यो मूल्याङ्कन ट्रम्प र युक्रेनी राष्ट्रपति भ्लोदिमिर जेलेन्स्की बिचको भेटघाटभन्दा ठीक अगाडि ह्वाइट हाउसलाई बुझाइएको थियो।

१ हजार माइलसम्मको मार क्षमता भएका यी मिसाइलहरू युक्रेनले रुसभित्रका तेल र ऊर्जा केन्द्रहरूलाई लक्षित गर्नका लागि माग गर्दै आएको छ। मूल्याङ्कनले युरोपेली सहयोगीहरूलाई उत्साहित बनाएको छ।

तर, ट्रम्पले जेलेन्स्कीसँगको भेटमा भने ‘हामीले हाम्रो देशको सुरक्षाको लागि आवश्यक पर्ने सामग्री दिन चाहँदैनौँ’ भन्दै मिसाइल उपलब्ध नगराउने इच्छा व्यक्त गरेका थिए। उनले रुसी राष्ट्रपति भ्लादिमिर पुटिनसँग टेलिफोनमा कुरा गरेको एक दिनपछि यो निर्णय आएको थियो।

पुटिनले टोमाहक मिसाइलले रुस-अमेरिका सम्बन्धलाई क्षति पुर्‍याउने बताएका थिए।