युरोपेली संघका फाइभजी नेटवर्कबाट जोखिमपूर्ण आपूर्तिकर्ताहरूलाई हटाउन थप समयसीमा पाउनसक्ने

१८ असाेज,काठमाडौँ । युरोपेली संघ (ईयू) का सरकारहरूको प्रस्तावअनुसार, युरोपेली मोबाइल सेवा प्रदायकहरूले उच्च जोखिम मानिएका आपूर्तिकर्ताहरूका उपकरणहरू चरणबद्ध रूपमा हटाउन थप समय पाउन सक्छन्।

युरोपेली आयोगले जनवरीमा प्रस्तावित ‘ईयू साइबर सुरक्षा ऐन’ अन्तर्गत जोखिमपूर्ण आपूर्तिकर्ताहरूलाई हटाउन ३६ महिनाको समयसीमा प्रस्ताव गरेको थियो।

ईयू सदस्य राष्ट्रहरूले सुरक्षा जोखिमको स्तर, नेटवर्कको अवस्था र विकल्पहरूको उपलब्धताजस्ता पक्षहरूलाई ध्यानमा राख्दै उक्त समयसीमा अझ लचिलो हुन सक्ने बताएका रोयटर्सले रिपोर्ट गरेको छ।

युरोपेली आयोगले जनवरीमा ‘ईयू साइबर सुरक्षा ऐन’मा व्यापक सुधार गर्ने क्रममा उच्च जोखिमयुक्त आपूर्तिकर्ताहरूका उपकरण तथा पाटपुर्जाहरूलाई संवेदनशील क्षेत्रहरूबाट क्रमशः हटाउने प्रस्ताव अघि सारेको छ; यो कदमले मुख्यतया ह्वावे र अन्य चिनियाँ प्रविधि कम्पनीहरूलाई असर पार्नेछ।

यसमा मोबाइल सेवा प्रदायकहरूका लागि ३६ महिनाको चरणबद्ध हटाउने अवधिको प्रस्ताव गरिएको थियो। साइबर तथा ‘र्यान्समवेयर’ आक्रमणहरू र विदेशी जासुसीसम्बन्धी बढ्दो चिन्ताका कारण युरोपले चिनियाँ प्रविधिमाथि निगरानी कडा पारेको छ।

तर सेप्टेम्बर २२ को एक दस्तावेजअनुसार, युरोपेली संघका सरकारहरूले आयोगको प्रस्तावबाट उक्त समयसीमा हटाएका रिपोर्टमा भनिएको छ।