०२ मंसिर, काठमाडौँ। सामाजिक सेवा, मानवीय सहयोग तथा परोपकारी कार्यमा सक्रिय रहँदै आएको सामाजिक संस्था शुभ प्रभात नेपालले आगामी मंसिर १९ गते शनिबार बृहत् रक्तदान कार्यक्रम आयोजना गर्ने भएको छ।
संस्थाले विगतका वर्षहरूमा झैँ यस वर्ष पनि रक्तदान कार्यक्रमलाई निरन्तरता दिँदै २०८३ साल मंसिर १९ गते उक्त कार्यक्रम आयोजना गर्न लागेको हो।
बूढानीलकण्ठ नगरपालिका–१०, कपनस्थित सुकेधारा प्रहरी बिट चोक, मनकामना मार्ट अगाडि आयोजना हुने उक्त कार्यक्रम बिहान १० बजेदेखि दिउँसो २ बजेसम्म सञ्चालन हुनेछ।
‘रक्तदान जीवनदान’ भन्ने मानवीय भावनालाई आत्मसात् गर्दै आयोजना गर्न लागिएको यस कार्यक्रममार्फत रगतको अभावमा जीवन रक्षाका लागि संघर्ष गरिरहेका बिरामीहरूलाई सहयोग पुर्याउने उद्देश्य राखिएको संस्थाले जनाएको छ।
रक्तदान केवल सामाजिक कार्य मात्र नभई मानव जीवन बचाउने महान् अभियानसमेत भएकाले समाजका प्रत्येक सचेत नागरिकले यस्ता मानवीय कार्यमा सक्रिय सहभागिता जनाउनुपर्ने संस्थाको धारणा रहेको छ।
‘रक्तदान गरौँ, अमूल्य जीवन बचाऔँ’ भन्ने मूल नाराका साथ सञ्चालन हुन लागेको कार्यक्रममा सम्पूर्ण रक्तदाता, समाजसेवी, बुद्धिजीवी, शुभचिन्तक तथा आम नागरिकलाई उपस्थित भई रक्तदान गर्न संस्थाले हार्दिक अपिल गरेको छ।
शुभ प्रभात नेपालका तर्फबाट आयोजना हुन लागेको उक्त कार्यक्रमको संयोजन श्री टंकप्रसाद नरालले गर्ने जनाइएको छ। संस्थाले कार्यक्रममा सहभागी भई मानवीय सेवाको यस अभियानलाई सफल बनाउन सहयोग पुर्याउनुहुने सम्पूर्ण महानुभावहरूप्रति अग्रिम आभार व्यक्त गरेको छ।
कार्यक्रम विवरण
मिति: २०८३ साल मंसिर १९ गते, शनिबार
समय: बिहान १०:०० देखि दिउँसो २:०० बजेसम्म
स्थान: सुकेधारा प्रहरी बिट चोक, मनकामना मार्ट अगाडि, कपन, काठमाडौं
आयोजक: शुभ प्रभात नेपाल
कार्यक्रम संयोजक: श्री टंकप्रसाद नराल
रक्तदान गरौँ, जीवन बचाऔँ।
मानव सेवाभन्दा ठूलो धर्म अरू छैन।


+ There are no comments
Add yours