ट्रम्पले ‘ग्राउन्ड बिफ’ आयातमा गरे ९० दिनका लागि भन्सार छुट

०६ भाद्र, काठमाडौँ । संयुक्त राज्य अमेरिकाले आगामी ९० दिनसम्म तीन लाख टनसम्म ‘ग्राउन्ड बिफ’ (गाईको पेलिएको मासु) लाई भन्साररहित अवस्थामा आयात गर्न अनुमति दिने भएको छ।

राष्ट्रपति डोनाल्ड ट्रम्पले चुनाव नजिकिँदै गर्दा अमेरिकी उपभोक्ताका लागि गाईको मासुको मूल्य घटाउने प्रयास गरिरहेको देखिन्छ। ‘हामी हाम्रा पशुपालकहरूलाई सहयोग गर्न काम गरिरहेको भए पनि आगामी ९० दिनसम्म संयुक्त राज्य अमेरिकाले ‘ग्राउन्ड बिफ’का लागि तीन लाख मेट्रिक टनसम्मको उत्पादनलाई कोटाबाहिरको भन्साररहित आयात गर्न अनुमति दिनेछ’, राष्ट्रपति ट्रम्पले सामाजिक सञ्जाल ट्रुथ सोसलमा लेखेका छन्।

अमेरिकी राष्ट्रपतिले कुन कुन देशले यो बिफ निर्यात गर्ने भन्ने कुराचाहिँ उल्लेख गरेका छैनन्। तर ‘ग्राउन्ड बिफ’लाई बजार मूल्यभन्दा २५ प्रतिशत कममा बेच्ने प्रतिबद्धता जनाएका छन्। ‘यो सम्झौताले अमेरिकीहरूका लागि मूल्य घटाउनेछ र हाम्रा महान् किसानहरूलाई ठाउँ दिनेछ’, राष्ट्रपति ट्रम्पले लेखेका छन्।

अमेरिकी उपभोक्ताहरू उच्च खाद्य मूल्यको निरन्तर दबाबमा छन्, जसमा इरान युद्धसँग जोडिएको ऊर्जा संकटले इन्धन र यातायात खर्च बढाएर थप प्रभाव पारेको छ।