इरानमा ३७ दिनदेखि इन्टरनेट सेवा अवरुद्ध

२३ चैत, काठमाडौँ । अमेरिका र इजरायलले फेब्रुअरी २८ मा इरानमा आक्रमण गरेलगत्तै लागू गरिएको इरानको इन्टरनेट अवरुद्धता अहिलेसम्म रेकर्ड गरिएको ‘सबैभन्दा लामो’ राष्ट्रव्यापी अवरोध भएको इन्टरनेट अनुगमन तथा विश्लेषण गर्ने संस्था नेटब्लक्सले आइतबार जनाएको छ।

नेटब्लक्सले ट्वीटमा भनेको छ, “इरानको इन्टरनेट अवरोध कुनै पनि देशमा अहिलेसम्मकै सबैभन्दा लामो राष्ट्रस्तरीय इन्टरनेट अवरोध हो। यो लगातार ८६४ घण्टा अर्थात् ३७औँ दिनसम्म पनि खुलेको छैन।”

अर्को ट्वीटमा नेटब्लक्सले उल्लेख गरेको छ, “केही देशहरूले लामो समयसम्म बिच–बिचमा वा क्षेत्रीय स्तरमा इन्टरनेट अवरोधको अनुभव गरेका छन् भने उत्तर कोरियामा अहिले पनि विश्वव्यापी इन्टरनेट सञ्जालमा जडान गरिएको छैन।”

“हामी केवल भरपर्दो समाचार सुन्न सक्षम हुन निरन्तर सम्पर्कको उपायको खोजीमा छौँ,” मध्य सहर इस्फाहानकी एक ४७ वर्षीया महिलाले शनिवार एएफपीसँग इन्टरनेट अवरोधबारे चिन्ता व्यक्त गरिन्।

“इन्टरनेट बिना हुनु मलाई अक्सिजन बिना हुनुजस्तो लाग्छ। म फसेको र निसास्सिएको महसुस गरिरहेको छु,” तेहरानका एक ५३ वर्षीय स्थानीयले बताए।

इरानको अत्यन्त प्रतिबन्धित स्थानीय इन्टरनेटले युद्धभरि काम गरिरहेको छ, जसले मानिसहरूलाई घरेलु वेबसाइटहरूमा जोडिन सम्भव बनाएको छ।

समाचारका लागि अन्तर्राष्ट्रिय इन्टरनेटमा जडान गर्न वा इन्स्टाग्रामजस्ता प्रतिबन्धित सामाजिक सञ्जाल प्रयोग गर्न केहीले नेटवर्क उपलब्ध हुँदा दुर्लभ क्षणहरूमा आफ्नो पहिचान लुकाउन भर्चुअल प्राइभेट नेटवर्क (VPN) प्रयोग गरिरहेका छन्।

युद्ध सुरु भएदेखि नै VPN प्रयोग गरेको आशङ्कामा इरानीहरूले पक्राउ पर्ने वा जेल हालिने चेतावनी दिने सूचना र सन्देशहरू प्राप्त गर्ने गरेका छन्।

धेरै सीमित व्यक्तिसँग मात्रै स्टारलिङ्क वा अन्य उपग्रह–आधारित इन्टरनेट प्रदायकमा पहुँच छ। इरानमा यस्ता नेटवर्क पनि प्रतिबन्धित छन्।

यसअघि जनवरीमा सरकारविरोधी प्रदर्शनका क्रममा हजारौँको ज्यान जाने घटनापछि इरानीहरूले १८ दिनसम्म इन्टरनेट अवरोधको सामना गरेका थिए।