हङकङ विमानस्थलमा कार्गो विमान समुद्रमा खस्यो, दुई जनाको मृत्यु

०३ कात्तिक, हङकङ । हङकङ अन्तर्राष्ट्रिय विमानस्थलको धावनमार्गमा स्किड भएर एउटा कार्गो विमान समुद्रमा खसेको छ। स्थानीय सञ्चार माध्यमका अनुसार यस दुर्घटनामा परी दुई जनाको मृत्यु भएको छ।

एमिरेट्सको उडान नम्बर ईके९७८८ (एरोट्रान्सकार्गो) दुबईबाट स्थानीय समयअनुसार बिहान करिब ०३:५० बजे अवतरण गर्ने क्रममा उत्तरी धावनमार्गमा एउटा गाडीमा ठोक्किएको थियो।

नागरिक उड्डयन विभागका अनुसार दुर्घटनापछि विमानस्थलको जमिनमा कार्यरत दुई जना कर्मचारी समुद्रमा खसेका थिए। उनीहरूको उद्धार गरिए पनि पछि अस्पतालमा मृत्यु भएको सार्वजनिक प्रसारण संस्था आरटीएचके लगायत स्थानीय सञ्चार माध्यमले प्रहरीलाई उद्धृत गर्दै जनाएका छन्। विमानमा सवार चार जना चालक दलका सदस्य भने सकुशल उद्धारपछि उपचारका लागि अस्पताल लगिएका छन्।

दुर्घटनापछि प्रभावित उत्तरी धावनमार्ग बन्द गरिएको छ, तर विमानस्थलका अन्य दुई धावनमार्ग भने सञ्चालनमा रहेका छन्। विमानस्थल प्राधिकरणले स्थानीय समयअनुसार बिहान १०:०० बजे पत्रकार सम्मेलन गर्ने तयारी गरेको छ। राम्रो सुरक्षा रेकर्ड रहेको यस विमानस्थलमा यस्तो दुर्घटना बिरलै हुने गरेको छ।