विश्व बैंक दक्षिण एशियाको उपाध्यक्षमा जट्ट

१६ असार, काठमाडौं । विश्व बैंक दक्षिण एशिया क्षेत्रको उपाध्यक्षमा जोहान्श जट्ट नियुक्त भएका छन् । जुलाई १ देखि लागू हुने गरेर उनलाई उपाध्यक्षमा नियुक्त गरिएको हो ।

उनले नेपालसहित बंगलादेश, भुटान, भारत, माल्दिभ्स र श्रीलंकालाई हेर्ने छन् । त्यसक्रममा उनले यस क्षेत्रमा विश्व बैंकद्वारा सञ्चालित ३९ अर्ब डलर बराबरको परियोजनामा प्रत्येक्ष निरिक्षण तथा प्राविधिक सहायता प्रदान गर्नेछन् ।

उनको नेतृत्वमा विश्व बैंकले दक्षिण एशियाली क्षेत्रमा रोजगारी सिर्जना, जलवायु परिवर्तन न्यूनिकरण तथा प्राकृतिक प्रकोप न्यूनिकरणमा भूमिका खेल्नेछन् । यसबाहेक मावनीय क्षमता अभिवृद्धि र नीजि क्षेत्रको पुँजी परिचालनमा समेत भूमिका खेल्ने नेपालस्थित विश्व बैंकको कार्यलयले जनाएको छ ।

सन् १९९९ देखि विश्व बैंकमा आवद्ध भएका डच मुलका नागरीक जट्ट दक्षिण एशियाली क्षेत्रको उपाध्यक्ष नियुक्त हुनुअघी विश्व बैंक ब्राजिलका निर्देशक थिए । उनले बंगलादेश, भुटान, नेपाल, टर्की लगायतका विभिन्न देशहरुको निर्देशकको रुपमा समेत काम गरिसकेका छन् ।

‘म दक्षिण एशियाको बलियो र तिव्र विकास प्रक्रिया देखेर दंग छु । मैले यो क्षेत्रमा १० वर्ष सेवा गर्दा देखिनै क्षेत्रिय विकास अघि बढेको थियो,’ उनले कार्यभार सम्हाल्दै भने, ‘अब फेरि यो क्षेत्रको विकासका निमित्त आफ्नो तर्फबाट उल्लेखनीय योगदान दिनेछु ।’