एक हजार अवैध खानी बन्द गर्न आदेश

१४ असाेज, काठमाडौँ । इन्डोनेसियाका राष्ट्रपति प्रबोवो सुबिआन्तोले देशको प्रमुख टिन उत्पादन गर्ने क्षेत्र सुमात्रा टापुको बङ्गका बेलितुङ प्रान्तमा करिब एक हजार अवैध टिन खानी बन्द गर्ने आदेश दिएका छन्।

गत सेप्टेम्बर १ मा सुरु गरिएको यो कदमले सन् २०२६ सम्ममा ४५ ट्रिलियन रुपिया (लगभग २.८ बिलियन अमेरिकी डलर) सम्मको राज्यको घाटा रोक्ने अनुमान गरिएको छ।

राष्ट्रपति प्रबोवोले बङ्गका बेलितुङबाट हुने टिन उत्पादनको करिब ८० प्रतिशत विभिन्न च्यानल मार्फत विदेशमा तस्करी हुने गरेको बताएका छन्। उनले भने, “साना डुङ्गा देखि यात्रु डुङ्गासम्म विभिन्न च्यानल मार्फत तस्करी हुने गरेको थियो।”

अब सबै तस्करी मार्गहरू बन्द गरिएको बताउँदै राष्ट्रपतिले तस्करीका लागि कुनै बाटो नरहेको र डुङ्गाबाट तस्करी गर्न नसक्ने व्यवस्था मिलाइएको स्पष्ट पारेका छन्।

अवैध खननलाई रोक्न र राज्यको राजस्वलाई सुदृढ पार्ने आफ्नो प्रशासनको दृढतालाई उल्लेख गर्दै राष्ट्रपति प्रबोवोले खनिजहरू पहिचान गर्न मद्दत गर्न रसायनशास्त्री भर्ती गर्न भन्सार महानिदेशालयलाई निर्देशन दिएका छन्।