सन् २०३६ को ओलम्पिक आयोजना गर्न भारतले अघि सार्‍यो प्रस्ताव

१८ असार, काठमाडौं । भारतले सन् २०३६ को ओलम्पिक खेल आयोजना गर्नका लागि औपचारिक दाबी अघि सारेको छ। मंगलबार लुसानेमा अन्तर्राष्ट्रिय ओलम्पिक समिति (आईओसी) का अधिकारीहरूसँग भेट गर्दै भारतले सन् २०३६ को ग्रीष्मकालीन ओलम्पिकका लागि अहमदाबादलाई प्रस्तावित सहरको रूपमा प्रस्तुत गरेको हो।

उक्त उच्चस्तरीय प्रतिनिधिमण्डलमा भारतको केन्द्रीय खेल मन्त्रालय, गुजरात सरकारका प्रतिनिधि र भारतीय ओलम्पिक संघ (आईओए) की अध्यक्ष पीटी उषा सहभागी थिए। यो बैठक केही दिनअघि मात्र आईओसीले होस्ट सहर चयन प्रक्रिया केही समयका लागि रोक्ने घोषणा गरेपछि भएको हो।

प्रतिनिधिमण्डलले अहमदाबादमा ओलम्पिक आयोजना गर्ने भारतको दृष्टिकोण प्रस्तुत गर्ने मौका पाएको जनाएको छ। साथै, आईओसीबाट ओलम्पिक आयोजना गर्न आवश्यक मापदण्ड र ओलम्पिक आन्दोलनको भविष्यका योजनाबारे महत्वपूर्ण जानकारी लिएको पनि उल्लेख गरिएको छ।

भारतले अक्टोबर २०२४ मै औपचारिक रूपमा चासो पत्र बुझाएको थियो। २०३६ को ओलम्पिक आयोजना गर्ने होडमा भारतसँगै साउदी अरेबिया, इन्डोनेशिया, टर्की र चिलीजस्ता देशहरू प्रतिस्पर्धामा छन्। तर, आईओसीले हालै चयन प्रक्रिया रोक्ने निर्णय गरेकाले औपचारिक घोषणा केही समयका लागि ढिला हुन सक्छ।

आईओसी सदस्यहरूबीच आयोजना सहरको छनोट प्रक्रियामा थप पारदर्शिता र संलग्नताको माग बढेसँगै चयन प्रक्रिया स्थगित गरिएको हो।