हृवाइट हाउसले ‘फायरवर्क’ गीत दुरुपयोग गरेपछि केटी पेरी आक्रोशित

१० साउन, काठमाडौँ । अमेरिकी गायिका केटी पेरीले इरानमाथिको अमेरिकी सैन्य आक्रमणबारे बनाइएको टिकटक भिडियोमा आफ्नो चर्चित गीत ‘फायरवर्क’ दुरुपयोग गरिएको भन्दै कडा आपत्ति जनाएकी छन् ।

हृवाइट हाउसले बिहीबार आफ्नो आधिकारिक टिकटक खातामा इरानमा बम विस्फोट भइरहेका दृश्यहरू समावेश गरी एउटा छोटो भिडियो पोस्ट गरेको थियो, जसको क्याप्सनमा लेखिएको थियो— ‘इरानलाई चेतावनी दिइएको छ ।’ भिडियोमा बम विस्फोटका दृश्यहरूलाई केटी पेरीको गीत ‘फायरवर्क’को ‘बूम, बूम, बूम’ भन्ने शब्दसँग मिलाएर सिंक गरेर राखिएको थियो ।

शनिबार सामाजिक सञ्जाल ‘एक्स’ मा आफ्नो धारणा सार्वजनिक गर्दै पेरीले विनाश र हिंसाको भिडियोमा आफ्नो सन् २०१० को हिट गीतलाई ‘हतियारको रूपमा प्रयोग गरिएको देख्दा’ आफू अत्यन्तै स्तब्ध र आक्रोशित भएको बताएकी छन् ।

‘मैले यसका लागि कुनै अनुमति दिएकी थिएन, मलाई सोधिएको पनि थिएन । म यसको पूर्ण रूपमा विरोध गर्दछु,’ पेरीले लेखिकी छन्, ‘फायरवर्क गीत आशा, शक्ति र भित्री क्षमताको प्रतीकका रूपमा लेखिएको हो । हृवाइट हाउसले गरेको यसको प्रयोग गीतको मर्ममाथिकै गम्भीर प्रहार हो ।’

उनले आफ्नो संगीत मानिसहरूलाई जोड्नका लागि भएको भन्दै युद्धको उत्सव मनाउनका लागि नभएको जिकिर गरेकी छन् । यस विषयमा हृवाइट हाउसले तुरुन्तै कुनै प्रतिक्रिया दिइसकेको छैन । पेरीले उक्त भिडियो हटाउनका लागि कानुनी कदम चाल्ने वा नचाल्ने भन्नेबारे केही खुलाएकी छैनन् ।

राष्ट्रपति डोनाल्ड ट्रम्प र उनको प्रशासनले प्रयोग गरेका भिडियोहरूमा आफ्ना गीतहरू नराख्न चेतावनी दिने पेरी पहिलो कलाकार भने होइनन् । गत जुनमा गायिका आरियाना ग्रान्डेले सीमा सुरक्षा बलले मानिसहरूलाई नियन्त्रणमा लिइरहेको दृश्यमा आफ्नो गीत ‘बाई’ प्रयोग गरिएपछि हृवाइट हाउसको कडा आलोचना गरेकी थिइन् ।

त्यसैगरी, गायिका सब्रिना कार्पेन्टर, ओलिभिया रोड्रिगो र रक ब्यान्ड ‘सेमिसोनिक’ले पनि आफ्ना गीतहरू ट्रम्प प्रशासनका भिडियोहरूमा प्रयोग गरिएकामा आपत्ति जनाइसकेका छन् ।