बेवास्तामा रानीमहल, भित्तामा लेउ, प्राङ्गणमा फोहोर (तस्बिरहरू)

१९ कार्तिक, पाल्पा । पाल्पाको प्रमुख पर्यटकीय स्थल रानीमहलमा लगाएको रङ्ग उडेर भित्तामा लेउ लाग्न थालेको छ । रानीमहलको व्यवस्थापनमा तानसेन नगरपालिकाले बेवास्ता गर्दा यहाँको सरसफाइ भएको छैन भने भवनको रङ्गरोगन उडेको छ ।

तानसेन नगरपालिकाले प्रवेश शुल्क उठाउने गर्छ भने पार्किङ शुल्क बगनासकाली गाउँपालिकाले उठाउँदै आएको छ । तानसेन नगरपालिकाले गत साउनदेखि कार्तिक १२ गतेसम्म १३ लाख ७० हजार ३ सय राजस्व सङ्कलन गरेको छ ।

घुम्न जाने पर्यटक रानीमहल भित्रै बसेको, प्रहरीले कपडा सुकाएर अशोभनीय कार्य गरेको, फोहोर सफा नगरेको गुनासो स्थानीयले गरेका छन् ।

२०७५ साउनमा पुरातत्त्व विभागले १० वर्षका लागि तानसेन नगरपालिकालाई रानीमहल हस्तान्तरण गरेको छ । दैनिक कम्तीमा ३ सय पर्यटकले रानीमहलको अवलोकन गर्ने गरेको तानसेन नगरपालिकाले जनाएको छ ।

वर्षायामपछि रानीमहलमा कालो धब्बा देखिँदै आएको तर विभिन्न प्रक्रिया पूरा गर्नुपर्ने भएकाले रंगरोगन गर्न ढिलाइ भएको नगर प्रमुख सन्तोषलाल श्रेष्ठले जानकारी दिए । वि.सं.१९५० मा निर्माण सुरु भएर १९५४ मा निर्माण कार्य सम्पन्न भएको ऐतिहासिक तथा पुरातात्त्विक महत्वको रानीमहललाई प्रेमका प्रतिकका रूपमा चिनिन्छ । तत्कालीन जनरल खड्ग शमशेरले आफ्नी रानी तेजकुमारीको सम्झनामा कालीगण्डकीको तटमा युनानी शैलीमा रानीमहल दरबार निर्माण गरेका हुन् । तस्बिर : मनिष अर्याल, नेपाल फोटो लाइब्रेरी