४५ लागिन् करीना : विवाहमा ‘लभ जिहाद’ विवाद, ‘जिरो फिगर’ ट्रेन्ड ल्याउने अभिनेत्री

०५ असाेज, एजेन्सी । चाहे ‘पू’ जस्तो स्टाइलिश भूमिका होस् वा चञ्चल ‘गीत’, करीना कपूरले आफ्ना प्रत्येक पात्रलाई विशेष बनाएकी छन्। जहाँ उनका परिवारका प्रायः सबै सदस्य चलचित्र क्षेत्रमा प्रवेश गर्ने सपना देख्थे, त्यहीँ उनी भने सुरुमा वकिल बन्न चाहन्थिन्। तर अभिनयप्रति बढ्दो आकर्षणका कारण उनले पढाइ अधुरै छोड्नुपर्‍यो।

करीना विगत २५ वर्षदेखि फिल्म उद्योगको महत्वपूर्ण हिस्सा बनेकी छिन्। यस क्रममा उनले धेरै पटक यस्ता निर्णय गरिन्, जसले सबैलाई अचम्ममा पारे। कहिले ठूला ब्लकबस्टर फिल्महरू अस्वीकार गरिन्, त कहिले आफ्ना छोराछोरीका नामबारे खुलेर निर्णय गरिन्। उनका प्रत्येक निर्णय स्पष्ट र साहसी देखिएका छन्।

आज आफ्नो ४५औं जन्मदिनमा करीना कपूर खानका केही यस्ता निर्णयबारे हेरौं।

करीना कपूर त्यस्तो परिवारबाट आउँछिन्, जो पुस्तौँदेखि फिल्म उद्योगसँग जोडिएको छ। तर उनी सुरुमा हिरोइन होइन, बरु वकिल बन्ने सपना देख्थिन्। उनलाई अमेरिका स्थित हार्वर्ड विश्वविद्यालयमा पढ्ने पनि ठूलो चाह थियो।

सुरुमा आमाले उनलाई एक्लै अमेरिका पठाउन नमाने पनि पछि करीना सबैलाई राजी पार्न सफल भइन्। उनी त्यहाँ ३ महिनाको समर कोर्स गर्न गइन् र यसरी हार्वर्ड जाने परिवारकी पहिलो छोरी बनिन्।

भारत फर्किएपछि उनले मुंबईको गभर्नमेन्ट ल’ कलेजमा भर्ना भइन्। साधारण विद्यार्थीझैँ कलेज जान थालिन्, तर परिवारलाई यो कुरा मन परेको थिएन। त्यतिबेलासम्म दिदी करिश्मा फिल्ममा स्थापित भइसकेकी थिइन्। तर अभिनयतर्फ झुकावका कारण उनले पढाइ बीचमै छोडेर चलचित्रमा प्रवेश गर्ने निर्णय गरिन्।

मैगजिन द वीक सँग कुरा गर्दै उनले भनिन् “म हार्वर्डको समर स्कूलमा पढ्न गएकोमा गर्व गर्छु। मलाई साँच्चिकै लाग्थ्यो कि म वकिल बन्छु। तर जब तपाईंभित्र अभिनयको कीरा हुन्छ, त्यसबाट बच्न सकिँदैन।”

१५ वर्षको उमेरमा प्रेमकथा र बोर्डिङ स्कूल

स्कूलमा पढ्दाखेरी करीना आफ्ना साथीलाई मन पराउन थालिन्। जब आमाले यसबारे थाहा पाइन्, फोन खोसिन्। तर एक दिन आमाले डिनरमा गएका बेला उनले चक्कुले कोठाको ताला तोडे र फोन लिएर त्यही साथीलाई भेट्न गइन्।

यस घटनापछि आमा बबीता निकै रिसाइन् र सजायका रूपमा उनलाई बोर्डिङ स्कूल पठाइन्।

फिल्म करिअरको सुरुवात

करीनाले सन् २००० मा अभिषेक बच्चनसँग फिल्म रिफ्यूजी बाट डेब्यू गरिन्। फिल्म असफल भए पनि उनको सुन्दरता र अभिनयले सबैको ध्यान खिच्यो।

रोचक कुरा के भने, उनलाई ऋतिक रोशनको कहो ना… प्यार है बाट डेब्यू गर्ने प्रस्ताव पनि आएको थियो। तर आमा बबिता र निर्देशक राकेश रोशनबीचको असहमतिको कारण उनले फिल्म छोडिन्।

त्यसपछि पनि करीनाले कल हो ना हो, राम-लीला, चेन्नई एक्सप्रेस, दिल धडकने दो, क्वीन, हम दिल दे चुके सनम जस्ता ठूला प्रोजेक्टहरू अस्वीकार गरेकी छिन्।

सेटमा विवाद

फिल्म ‘अजनबी’ को छायांकनका क्रममा अभिनेत्री बिपाशा बसुसँग उनको मनमुटाव भयो। विवाद यति बढ्यो कि उनले बिपाशालाई अपमानजनक शब्द प्रयोग गर्दै झापट पनि हानेको भनाइ छ।

चमेली-करिअरको टर्निङ पोइन्ट

सुधीर मिश्राको चमेली मा सेक्सवर्करको भूमिका गर्न उनले सुरुवातमा अस्वीकार गरिन्। तर पछि मानिन् र भूमिकाका लागि रेडलाइट क्षेत्रमै पुगेर अध्ययन गरिन्। यो फिल्मले उनको करिअरमा ठूलो मोड ल्यायो र उनलाई विशेष ज्यूरी अवार्ड दिलायो।

शाहिद–करीना प्रेमकथा

फिल्म फिदा को सेटमा शाहिद कपूरसँग उनको प्रेम शुरु भयो। दुवैलाई सार्वजनिक रूपमा धेरै पटक देखियो। तर जब वी मेट को छायांकनकै बेला दुवैबीच ब्रेकअप भयो। कारणबारे विभिन्न चर्चा भए, कसैले भन्यो परिवार असन्तुष्ट थियो, कसैले भने करीना अर्को कलाकारसँग नजिकिइन्।

सैफ अली खानसँग सम्बन्ध र विवाह

फिल्म ‘टशन’ को शूटिङमा करीना र सैफ नजिक भए। पछि सार्वजनिक कार्यक्रममा सैफले उनीहरू डेट गरिरहेको स्वीकार गरे। १६ अक्टोबर २०१२ मा उनीहरूले विवाह गरे। अहिले उनीहरूका दुई छोराहरू छन्, तैमूर अली खान र जहाँगीर (जेह) अली खान।

छोराको नामलाई लिएर विवाद

पहिलो छोराको नाम तैमूर राखेपछि ठूलो विवाद भयो। कतिपयले ऐतिहासिक आक्रमणकारीसँग जोडेर आलोचना गरे। यसबारे करीनाले भनिन्, “बच्चाको नाम राख्नु हाम्रो व्यक्तिगत अधिकार हो। अरू कसैलाई दखल दिन अधिकार छैन।”

मातृत्वपछि परिवर्तन

सैफसँग विवाहपछि र आमा बनेपछि करीनाले आफ्नो जीवनशैली र करिअरमा ठूलो परिवर्तन गरिन्। अब उनले कम तर सोचेर फिल्म रोज्छिन्। उनले बिहान व्यायाम गर्ने, छिट्टै डिनर गर्ने र समयमै सुतेर स्वस्थ जीवनशैली अपनाएको बताएकी छिन्।

नेपोटिज्म र बेबाक जवाफ

आमिर खानको लाल सिंह चड्ढा बहिष्कारको बेला करीनाको भिडियो भाइरल भएको थियो। उनले भनेकी थिइन्, “हामीलाई स्टार दर्शकहरूले बनाएका हुन्। तपाईंलाई मन पर्दैन भने फिल्म नहेर्नुहोस्। जबरजस्ती कसैले गरेको छैन।”