अमेरिका र जापानबीच ‘विशाल’ व्यापार सम्झौता

०८ साउन, काठमाडौँ । अमेरिकी राष्ट्रपति डोनाल्ड ट्रम्पले जापानसँग एउटा ‘विशाल’ व्यापार सम्झौता भएको घोषणा गरेका छन्, जसअन्तर्गत जापानको निर्यातमा १५ प्रतिशत भन्सार शुल्क लाग्नेछ। ट्रम्पले आफ्नो सामाजिक सञ्जाल ‘ट्रुथ सोसल’ मार्फत यो सम्झौता अहिलेसम्मकै सबैभन्दा ठूलो भएको दाबी गर्दै यसले लाखौँ रोजगारी सिर्जना गर्ने बताएका छन्।

ट्रम्पका अनुसार, यो सम्झौताले जापानलाई अमेरिकामा ५ खर्ब ५० अर्ब डलर लगानी गर्न प्रेरित गर्नेछ, जसबाट अमेरिकाले ९० प्रतिशत नाफा कमाउनेछ। यसअघि ट्रम्पले जापानसँग सम्झौता नभए अगस्ट १ देखि २५ प्रतिशत कर लगाउने धम्की दिएका थिए।

जापानी प्रधानमन्त्री शिगेरु इशिबाले भने सम्झौताको विवरणहरू सावधानीपूर्वक जाँच गरेपछि मात्रै टिप्पणी गर्न सकिने बताएका छन्। वासिङ्टनमा ट्रम्पको घोषणापछि टोकियोमा पत्रकारहरूसँग कुरा गर्दै उनले यस विषयमा हतारमा कुनै प्रतिक्रिया नदिने बताए।

ट्रम्पका अनुसार, यो सम्झौताअन्तर्गत जापानले कार, ट्रक, चामल र केही अन्य कृषि उत्पादनहरूका लागि आफ्नो बजार खोल्न सहमत भएको छ। यद्यपि, जापानमा चामल आयात एउटा संवेदनशील मुद्दा हो र इशिबाको सरकारले यसअघि यसमा कुनै छुट नदिने बताएको थियो।

ट्रम्पले अगस्ट १ को समयसीमा अघि विभिन्न देशहरूसँग व्यापार सम्झौताहरू गरिरहेका छन्। उनले मङ्गलबार नै फिलिपिन्ससँग पनि सम्झौता भएको घोषणा गरेका छन्, जसमा फिलिपिन्सको निर्यातमा १९ प्रतिशत कर लाग्नेछ। यसैगरी, इन्डोनेसिया र भियतनामसँग पनि यस्तै सम्झौताहरू भएका छन्। यद्यपि, अमेरिकाका शीर्ष तीन ठूला व्यापारिक साझेदारहरू चीन, क्यानडा र मेक्सिकोसँग वार्ता जारी छ।