अलिबाबा ग्रुपद्वारा ‘क्वेन३-कोडर’ नामक ओपन-सोर्स एआई मोडेल सार्वजनिक

०८ साउन, काठमाडौँ । अलिबाबा ग्रुपले बुधबार ‘क्वेन३-कोडर’ नामको ओपन-सोर्स कृत्रिम बुद्धिमत्ता मोडेल सार्वजनिक गरेको छ, जुन सफ्टवेयर विकासका लागि तयार गरिएको कम्पनीको अहिलेसम्मकै सबैभन्दा उन्नत कोडिङ उपकरण भएको दावी गरिएको छ।

यो तथ्य चीनका प्रविधि कम्पनीहरूबीच विश्वव्यापी एआई विकासको प्रतिस्पर्धा तीव्र भइरहेका बेला आएको हो, जहाँ प्रशान्त महासागरको दुवै किनाराका कम्पनीहरूले झनै परिष्कृत मोडेलहरू सार्वजनिक गरिरहेका छन्।

अलिबाबाका अनुसार क्वेन३-कोडर सफ्टवेयर विकासका कामहरू—जस्तै कोड उत्पादन गर्ने र जटिल कोडिङ कार्यप्रवाहहरू व्यवस्थापन गर्ने—का लागि डिजाइन गरिएको हो। कम्पनीले यो मोडेललाई “एजेण्टिक एआई कोडिङ कार्यहरू” मा विशेष रूपमा बलियो भएको जनाएको छ, जहाँ एआई प्रणालीहरूले स्वतन्त्र रूपमा प्रोग्रामिङ चुनौतीहरूमा काम गर्न सक्छन्।

अलिबाबाले सार्वजनिक गरेका प्रदर्शन सम्बन्धी तथ्यांकअनुसार क्वेन३-कोडरले डीपसिक र मूनशट एआईको के२ मोडललजस्ता डोमेस्टिक प्रतिस्पर्धीहरूलाई प्रमुख कोडिङ क्षमताहरूमा उछिनेको छ।

कम्पनीले यस मोडेलले केही क्षेत्रमा एन्थ्रोपिकको क्लाउड र ओपनएआईको जीपीटी-४ जस्ता अमेरिकी अग्रणी मोडेलसँग बराबरी प्रदर्शन गरेको दावी पनि गरेको रोयटर्सले उल्लेख गरेको छ।