बाढी आएको ११ दिनपछि यसरी घरको चौथो तलाबाट उद्धार गरिइन् ५५ वर्षकी चण्डिका

२० भदाै, काठमाडौँ । भोटेकोशी नदीमा आएको भीषण बाढी र पहिरोपछि ११ दिनदेखि सम्पर्कविहीन रहेकी ५५ वर्षीया चण्डिका श्रेष्ठलाई सशस्त्र प्रहरीले घरको चौथो तलाबाट जीवितै उद्धार गरेको छ ।

नुवाकोटको विदुर नगरपालिका–१० बेत्रावतीस्थित आनन्द श्रेष्ठको चार तले घरको चौथो तलामा फसेकी चण्डिकालाई सशस्त्र प्रहरी निरीक्षक सुमन विकको कमान्डमा खटिएको टोलीले उद्धार गरेको हो ।

पहिरोले घरको केही भाग पुरिएको अवस्थामा त्यहाँबाट मानिसले आवाज निकालेको सूचना पाएपछि सुरक्षाकर्मी घटनास्थल पुगेका थिए । त्यसपछि भग्नावशेष हटाउँदै खोजी गर्दा चण्डिकालाई जीवितै फेला पारिएको प्रहरीले जनाएको छ ।

उद्धारका क्रममा चण्डिका बोल्न सक्ने अवस्थामा रहेकी थिइन् । उद्धार टोलीले उनलाई पानीसमेत खुवाएको थियो । पानी खाएपछि उनको अवस्थामा केही सुधार देखिएको उद्धारमा खटिएका सुरक्षाकर्मीले बताएका छन् ।

सशस्त्र प्रहरीका डीएसपी शैलेन्द्र थापाका अनुसार चण्डिकालाई थप उपचारका लागि हेलिकप्टरमार्फत काठमाडौं ल्याउने तयारी भइरहेको छ ।

चण्डिकाका श्रीमान् आनन्द श्रेष्ठका अनुसार उनी ५५ वर्षकी हुन् । बाढी र पहिरोपछि लामो समयसम्म सम्पर्कमा नआएकी चण्डिका घरको चौथो तलामा जीवितै फेला परेपछि परिवार र स्थानीयमा खुसी छाएको छ ।

भदौ १० गते त्रिशूली नदीमा आएको भीषण बाढी र पहिरोका कारण बेत्रावतीसहित नुवाकोटका विभिन्न क्षेत्रमा ठूलो जनधनको क्षति भएको थियो । बाढी आएको ११ दिनपछि भग्नावशेषबाट चण्डिका जीवितै फेला पर्नुलाई असाधारण घटनाका रूपमा लिइएको छ ।