०४ कार्तिक, काठमाडाैं । त्रिशुली जलविद्युत कम्पनीले विद्यमान ७९ हजार ३६७ सेयरधनीबाट १६ करोड ४१ लाख १ हजार ४०१ रुपैयाँ बढी रकम संकलन गरेको छ ।
सिडिएस एण्ड क्लियरिङ्ग लिमिटेडका अनुसार कार्तिक ४ गते शुक्रबार दिउँसो साढे १ बजेसम्म ७९ हजार ३६७ वटा आवेदनबाट १८ लाख ८६ हजार २२३ कित्ता सेयरका लागि आवेदन परेको हो ।
त्रिशुली जलविद्युतले असोज ४ गतेदेखि आफ्ना सेयरधनीहरुलाई चुक्ता हुन बाँकी ८७ रुपैयाँका दरले रकम संकलन गर्न थालेको थियो । त्रिशुलीले २०७५ चैत ७ गतेदेखि जारी पुँजी २ अर्ब ४७ करोड रुपैयाँको १५ प्रतिशतले हुन आउने ३७ करोड ५ लाख रुपैयाँ बराबरको प्रतिकित्ता १०० अंकित दरका ३७ लाख ५ हजार कित्ता साधारण सेयर निष्कासन गरेको थियो ।
सो समयमा कम्पनीले अंकित मूल्यको १० रुपैयाँका दरले मात्र अग्रिम सेयर संकलन गरेको थियो । १० रुपैयाँका दरले रकम भुक्तानी गरेका सेयरधनीहरुबाट कम्पनीले उठाउन बाँकी ९० रुपैयाँमा ३ रुपैयाँका दरले ब्याज प्राप्त भएकाले ८७ रुपैयाँका दरले रकम जम्मा गर्न भनेको हो ।
कम्पनीको सेयर बाँडफाँडमा सेयर पाई प्रतिकित्ता १० रुपैयाँ बुझाएका जम्मा १ लाख ५४ हजार ५५९ जना सर्वसाधारण सेयरधनीले प्रतिकित्ता बाँकी ९० रुपैयाँ बुझाउनुपर्नेछ ।
विद्यमान सेयरधनीले आस्वा सेवामा सहभागी बैंक तथा वित्तीय संस्थाहरु र तिनका शाखा कार्यालयहरु तथा सिडिएस एण्ड क्लियरिङ लिमिटेडबाट उपलब्ध गराइएको ‘मेरो सेयर’ सफ्टवेयरबाट समेत शेयरधनीहरुले रकम बुझाउन सक्नेछन् । सेयरधनीहरुले यसरी रकम भुक्तानी गर्दा आश्वा शुल्क समेत तिर्नुपर्ने छैन । रकम बुझाउने अन्तिम मिति कात्तिक १७ गतेसम्म तोकिएको छ ।
कम्पनीको धितोपत्र निश्कासन तथा बिक्री प्रबन्धकमा ग्लोबल आइएमई क्यापिटल रहेको छ ।