२७ कात्तिक, मुम्बई । बलिउड अभिनेत्री कियारा आडवाणीलाई इन्डष्ट्रि ‘सेल्फ मेड’ अभिनेत्रीका रूपमा चिनिन्छ । गैरफिल्मी पृष्ठभूमिबाट आएकी कियाराको पहिलो चलचित्र ‘फग्ली’ बक्स अफिसमा असफल भए पनि आफ्नो मिहिनेत, लगनशीलता र प्रतिभाको बलमा उनले सफलताको नयाँ कथा लेखिन् ।
‘गुड न्यूज’, ‘गिल्टी’, ‘लस्ट स्टोरीज’, ‘इन्दु की जवानी’, र शेरशाह’ जस्ता चलचित्रमा महिलाको विविधरंगी पात्रपछि उनी चाँडै नै ‘भूल भूलैया २’, ‘जुग जुग जियो’, र ‘आरसी–१५’ मा देखिँदै छिन् । उनले नवभारत टाइम्ससँग करियर, सफलता, संघर्ष र परिवारको बारेमा गरेको कुराकानी :
आज फर्केर हेर्दा आफ्नो फिल्मी यात्रा कस्तो लाग्छ ?
सबैभन्दा पहिला त बलिउडमा आउने मौका मात्रै नभएर विविध भूमिका निभाउने अवसर पनि पाएकोमा म आभारी छु । मेरो अभिनय यात्रा धेरै उतारचढावबाट गुज्रिएको छ । मैले धेरै असफलता र रिजेक्सनहरू सहेँ, तर म तिनीहरूलाई मेरो यात्राको पाठको रूपमा मान्छु । ती तीता अनुभवहरूले मलाई बलियो बनायो, मैले बाटो पहिल्याउन सकेँ र मेरो छनोटहरूमा अडिग रहेँ ।
म सहमत छु कि मैले लिएका सबै निर्णयहरू सही भएनन्, यद्यपि त्यो मेरो लागि सिक्ने प्रक्रिया बन्यो । आज म आफ्नो करियरको जुन मुकाममा छु, त्यो निकै रोचक छ । किनभने, अभिनेत्रीको रूपमा निखारिएँ, चम्किएँ र अझै पनि मेरो खोज जारी छ ।
अभिनय क्षेत्रमा आउनुअघि तपाईं शिक्षिकाको काम गर्नुहुन्थ्यो भन्ने कुरा कतिको सत्य हो ?
तपाईं त्यसलाई पूर्ण रूपमा पढाउने काम भन्न सक्नु हुन्न । तर हो, मेरो पहिलो फिल्ममा काम गर्नुअघि, ६–८ महिनाका लागि म साना बालबालिकाहरूका लागि शिक्षक बनेको थिएँ ।
वास्तवमा त्यति बेला म अभिनय क्षेत्रमा संघर्ष गरिरहेकी थिएँ र अभिनयको कक्षाबाहेक अन्य कार्यशाला पनि लिइरहेकी थिएँ, त्यसैले मसँग थोरै समय थियो ।