०२ मंसिर, काठमाडौं । विश्वकप क्रिकेट छेकोमा फुटबल स्टार डेभिड बेकह्याम यतिबेला भारत भ्रमणमा छन् । राष्ट्रसंघीय नियोग युनिसेफको सद्भावना दूतको रुपमा मुम्बई पुगेका उनले वान्डखेडे रंगशालामा भारत र न्युजिल्याण्डबीचको खेल पनि हेरे ।
यतिबेला भारतीय सञ्चारमाध्यममा बेकह्याम र बलिउड सेलिब्रिटीको तस्वीर र भिडियो भाइरल बनेको छ । सोनम कपुर र आनन्द आहुजाले बेकह्यामको सम्मानमा मुम्बईमा भोज आयोजना गरे, जहाँ बलिउड सेलिब्रिटी सहभागी रहे ।
लगत्तै सुपरस्टार शाहरुख खानले मुम्बईको बान्द्रास्थित निजी निवास मन्नतमा बेकह्यामका लागि प्राइभेट पार्टीको आयोजना गरे । भाइरल भएका भिडियोमा बेकह्याम मन्नतभित्र छिरेको र बाहिरिएको देखिएको छ । त्यस क्रममा घेरिएका फ्यानतिर हात हल्लाएर बेकह्यामले अभिवादन गरेका छन् ।
शाहरुखको पार्टीमा सोनम र उनका पति आहुजा पनि सहभागी भए । आनन्दले सामाजिक सञ्जालमा सामूहिक तस्वीर सेयर गर्दै शाहरुख, गौरी र उनीहरुका सन्तान आर्यन र सुहानालाई पनि ट्याग गरेका छन् । बिहीबार राति मन्नतमा जमेको उक्त पार्टीमा शाहरुख र सोनमलाई स्टाइलिस पहिरनमा देख्न सकिन्छ ।
अभिनेत्री सारा अली खानले बेकह्यामको निजी र व्यावसायिक जीवनको सन्तुलनबारे अन्तर्वार्ता नै गरेकी छन् । यसबाहेक मलाइका अरोरा र अर्जुन कपुरसँग पनि बेकह्यामको तस्वीर सामाजिक सञ्जालमा भाइरल भइरहेको छ । धेरैले बेकह्यामसँगको तस्वीरमा अर्जुनको उचाइबारे ट्रोल गरेका छन् ।
मुम्बईको विश्वकप खेलमा बेकह्याम सचिन तेन्दुलकर र विराट कोहलीसँगै देखिएका छन् । कतिपय सेलिब्रिटीले बेकह्यामलाई आफ्नो ‘चाइल्डहुड क्रस’ भन्दै प्रशंसा गरेका छन् । युनिसेफको दूतको रुपमा इङल्याण्डका पूर्वफुटबलर बेकह्याम नेपालमा पनि आइसकेका छन् ।