२८ जेठ, एजेन्सी । प्रविधि क्षेत्रको लोकप्रिय कम्पनी एप्पलले अटोनोमस इलेक्ट्रिक कार निर्माण गर्न लागेको चर्चा केही समय यता चर्चामा छ । अहिले भने एप्पलले चीनको सीएटीएल र बीवाईडी जस्ता कम्पनीसँग इलेक्ट्रिक कारका लागि ब्याट्री आपूर्ति गर्ने समझदारीका लागि वार्तामा रहेको चर्चा चलेको छ ।
रिपोर्ट अनुसार एप्पलले ब्याट्री सप्लाईका लागि आवश्यक म्यानुफ्याक्चरिङ प्लान्ट अमेरिकामा राख्नु पर्ने शर्त राखेको छ । यद्यपि सीएटीएलले हाल अमेरिका र चीन बीच रहेको राजनीतिक तनावको अवस्थामा अमेरिकामा आफ्नो प्लान्ट राख्नेमा चासो दिएको छैन । सीएटीएलले टेस्लाका साथै विभिन्न कम्पनीहरुलाई ब्याट्री आपूर्ति गरिरहेको छ ।
हाल वार्ता प्रारम्भिक चरणमा रहेकाले सबै तथ्य सार्वजनिक भएको छैन । एप्पलले संसारका अन्य कम्पनीसँग पनि सहकार्यको लागि वार्ता गरिरहेको हुन सक्छ । सीएटीएल विश्वको सबैभन्दा ठूलो अटोमोटिभ ब्याट्री निर्माता कम्पनी हो भने बीवाईडी संसारकै चौथो ठूलो कार निर्माता कम्पनी हो ।
यो भन्दा पहिले एप्पलले आफ्नो इलेक्ट्रिक कारका लागि आफै नै ब्याट्री प्रविधि विकसित गर्न लागेको चर्चा पनि चलेको थियो । अहिले पनि सीएटीएल र बीवाईडीसँगको समझदारी अनुसार एप्पलको आफ्नै प्रविधि पनि प्रयोग हुन्छ वा हुँदैन भन्ने कुरा केही थाहा भएको छैन ।