१९ जेठ, जनकपुरधाम । मधेश सरकारले ऐनहरुमा उल्लेख प्रदेश नं. २ शब्द संशोधन गर्न प्रक्रिया थालेको छ ।
शुक्रबार बसेको प्रदेशसभा बैठकबाट केही ऐनलाई संशोधन गर्न बनेको विधेयक पारित भएको छ ।
मुख्यमन्त्री सरोजकुमार यादवले विचार गरियो भन्दै उक्त विधेयक छलफलका लागि प्रदेशसभामा पेश गरेका थिए ।
छलफल पश्चात सो विधेयक प्रदेशसभा बैठकबाट स्वीकृत भएको सभामुख रामचन्द्र मण्डलले घोषणा गरेका हुन् ।
साविकको प्रदेश नं. २ को नाम मधेश र स्थायी राजधानी जनकपुरधाम ३ माघ २०७८ मा प्रदेशसभा सदसयको दुई तिहाइ बहुमतले पारित भएको थियो । त्यसअघि प्रदेशसभाबाट बनेका ऐनहरुमा प्रदेश नं. २ उल्लेख छ ।
प्रदेश नं. २ शब्द संशोधन गर्न मधेश सरकारले केही ऐनलाई संशोधन गर्न बनेको विधेयक सदनमा पेश गरेको थियो । अब प्रदेश नं. २ शब्द ऐनहरुमा संशोधन गरी मधेश प्रदेश उल्लेख गर्न बाटो खुलेको छ ।