०६ असार, काठमाडौं । अखिल नेपाल फुटबल संघ (एन्फा)को २१औं साधारणसभा सुरु भएको छ।
बुढानीलकण्ठस्थित पार्क भिलेज रिसोर्टमा युवा तथा खेलकुदमन्त्री महेश्वरजंग गहतराज र राष्ट्रिय खेलकुद परिषद् (राखेप) सदस्य सचिव टंकलाल घिसिङले साधारणसभाको उद्घाटन गरेका हुन्।
साधारणसभामा एन्फामातहतका ४८ जिल्ला, १४ ए डिभिजन, ११ बी डिभिजन, ९ सी डिभिजन, रेफ्री, प्रशिक्षक, खेलाडी र महिला संघ तथा राष्ट्रिय लिगका लागि छानिएका चार क्लबका गरी १०४ जन प्रतिनिधि उपस्थित छन्।
उद्घाटन कार्यक्रमपछि बन्द सत्र र त्यसपछि लगत्तै चुनावी प्रक्रिया सुरु हुनेछ। बन्द सत्र साढे १२ बजेबाट सुरु हुनेछ।
एन्फाको नयाँ नेतृत्वका लागि हालका अध्यक्ष कर्माछिरिङ शेर्पा र वरिष्ठ उपाध्यक्ष पंकजबिक्रम नेम्वाङको प्यानलबीच मुख्य प्रतिस्पर्धा हुने देखिएको छ। अध्यक्षमा कर्माछिरिङ र पंकजबिक्रमसहित फ्रेन्ड्स क्लबका पूर्वअध्यक्ष राजीव पौड्याल पनि प्रतिस्पर्धामा छन्। पौड्याल भने एकल (प्यानल बिनाका) उम्मेदवार हुन्।
एन्फामा अध्यक्षका लागि लामो समयदेखि सँगै रहेका वर्तमान अध्यक्ष शेर्पा र वरिष्ठ उपाध्यक्ष नेम्वाङले भने २१ सदस्यीय कार्यसमितिका लागि प्यानल नै बनाएर अघि बढेका छन्।
एन्फाको साधारण सभाले १ अध्यक्ष, १ वरिष्ठ उपाध्यक्ष, ४ उपाध्यक्ष र २ महिलासहित १५ सदस्य निर्वाचित गर्नेछ। वरिष्ठ उपाध्यक्षमा २, उपाध्यक्षमा ४, महिला सदस्यमा ५ र सदस्यमा ३६ जनाको उम्मेदवारी दर्ता भएको निर्वाचन समितिले जनाएको छ। १५ सदस्यमध्ये १३ जना खुल्ला र २ जना महिला सदस्यका लागि पनि दुवै प्यानलेबाट उम्मेदवार छन्।