१४ भदाै, काठमाडाैँ । बुद्धभुमि नेपाल हाइड्रोपावरले प्रभावित क्षेत्रका बासिन्दाका लागि निष्काशन गरेको प्राथमिक शेयरमा आवेदन दिने म्याद थप गरेको छ । कम्पनीले भदौ १४ गते आज सार्वजनिक विदा परेको भन्दै आवेदन दिने म्याद एक दिनका लागि थप गरेको हो । गत साउन ३२ गतेदेखि निष्काशन गरिएको प्राथमिकमा आवेदन दिने आज अन्तिम दिन थियो । अव प्रभावित क्षेत्रका बासिन्दाले भोलिसम्म आवेदन दिन सक्ने धितोपत्र निष्काशन तथा बिक्री प्रवन्धक सिभिल क्यापिटलले जनाएको छ ।
कम्पनीले प्रतिशेयर १०० अंकित मूल्यका १२ लाख कित्ता साधारण शेयरमध्ये ४ लाख कित्ता शेयर आयोजना प्रभावित क्षेत्र नुवाकोट जिल्लाका बासिन्दाहरुका लागि निष्काशन गरेको हो । प्रभावितले नुवाकोट जिल्लामा रहेका ज्योति विकास बैंक, प्रभु बैंक र सिभिल बैंकका तोकिएका शाखा कार्यालयबाट आवेदन दिन सक्नेछन् ।
लगानीकर्ताले न्यूनतम १० कित्ता शेयर खरिदका लागि आवेदन दिन सक्नेछन् भने अधिकतममा ५० हजार कित्ताका लागि आवेदन दिन पाउनेछन् ।
आईपीओ निष्काशनका लागि गराएको रेटिङ्गमा कम्पनीलाई इक्रा नेपालले इक्रा एनपी इस्युअर रेटिङ्ग डबल बी माइनस प्रदान गरेको छ। यसले कम्पनीको दायित्व बहन गर्ने क्षमतामा औषत जोखिम रहेको संकेत गर्दछ।