३१ वैशाख, एजेन्सी । एक गोलले पछि परेको स्थिति उल्ट्याउँदै मर्सिसाइड क्लब लिभरपुलले म्यानचेस्टर युनाइटेडलाई उसकै मैदानमा ४–२ को हार चखाएको छ ।
ओल्ड ट्राफोर्डमा बिहीबार राति भएको खेलमा लिभरपुलको जितमा रोबर्टाे फिर्मिनोले दुई तथा डिएगो जोटा र मोहम्मद सलाहले समान एक गोल गरे । घरेलु टोलीका ब्रुनो फर्नान्डेस र मार्कुस रासफोर्डले गोल फर्काए ।खेलको १०औं मिनेटमा ब्रुनो फर्नान्डेसको गोलबाट म्यानचेस्टर युनाइटेडले अग्रता लिएको थियो । उनले आरोन वान विशाखाको पासमा गोल गरेका थिए । ३४औं मिनेटमा डिएगो जोटाले गोल गर्दै खेललाई १–१ गोलको बराबरीमा ल्याए ।
पहिलो हाफको इन्ज्युरी समयको थप गरिएको तेस्रो मिनेटमा ब्राजिली फरवार्ड रोबर्टाे फिर्मिनोले नाथानिल फिलिप्सको पासमा गोल गर्दै लिभरपुललाई खेलमा २–१ को अग्रता दिलाए । दोस्रो हाफको सुरुमै ४७औं मिनेटमा फिर्मिनोले ट्रेन्ट एलेक्सान्डर अर्नाेल्डको पासमा व्यक्तिगत दोस्रो तथा टोलीका लागि तेस्रो गोल गर्दै लिभरपुललाई ३–१ ले अघि बढाए ।
६८औं मिनेटमा मार्कुस रासफोर्डले इडिन्सन काभानीको पासमा गोल गर्दै खेललाई ३–२ को अवस्थामा ल्याए । तर खेलको अन्तिम समयमा मोहम्मद सलाहले कर्टिस जोन्सको पासमा गोल गर्दै लिभरपुललाई ४–२ को जित दिलाए । लिभरपुलले ओल्ड ट्राफोर्डमा म्यानचेस्टरलाई पहिलोपटक पराजित गरेको हो । यसअघि लिभरपुलले ओल्ड ट्राफोर्डमा १५ खेल खेल्दा चार बराबरी खेल्दा ११ हारको नतिजा निकालेको थियो ।
जितपछि लिभरपुलले प्रिमियर लिगको शीर्ष चारमा पुग्ने सम्भावना जीवित राखेको छ । लिभरपुल शीर्ष चारको चेल्सीभन्दा ४ अंकले पछि छ । एक खेल कम खेलेको लिभरपुल ३५ खेलबाट ६० अंक जोडेर पाँचौ स्थानमा रहेको छ । चेल्सीको ६४ तथा लेस्टर सिटीको ६६ अंक छ । पराजित म्यानचेस्टर युनाइटेड ७० अंक जोडेर दोस्रो स्थानमा यथावत छ ।