३०कात्तिक, काठमाडाैं । सुनको भाउ वृद्धिले बुधबार पनि निरन्तरता पाएको छ । उता चाँदीको भाउ भने बुधबार घटेको नेपाल सुनचाँदी व्यवसायी महासंघले जनाएको छ ।
म्हासंघका अनुसार अघिल्लो दिन मंगलबारको तुलनामा सुनको भाउ तोलामा २०० रुपैयाँले बढेको हो भने चाँदी तोलामा ३० रुपैयाँले सस्तिएको छ । मंगलबार सुन १ हजार तथा चाँदी ३० रुपैयाँ तोलामा बढेको थियो ।
आजका लागि छापावाला सुन ९८ हजार ४०० रुपैयाँ, तेजावी सुनको मूल्य ९७ हजार ९०० र चाँदीको भाउ १ हजार २९५ रुपैयाँ तोकिएको छ । हिजो मंगलबार छापावाला सुन प्रति तोला ९८ हजार २०० रूपैयाँ, तेजावी सुन ९७ हजार ७०० रूपैयाँ र चाँदीको १ हजार ३२५ रूपैयाँमा कारोबार भएको थियो ।
अधिक उपभोगको महिना मंसिर नजिकिँदै गर्दा सुनचाँदीको भाउ उकालो लाग्दा सुन किन्नुपर्नेहरु मारमा परेका छन् । अन्तर्राष्ट्रिय बजारमा माग बढेसँगै भएको मूल्यवृद्धिको असर नेपाली बजारमा पनि परेको व्यवसायी बताउँछन् । मंसिर महिनामा विहावारी धेरै हुने भएकाले सामान्य अवस्थाको तुलनामा तीन गुणासम्म सुनको माग हुने गरेको छ ।
यसैगरी अन्तर्राष्ट्रिय बजारमा आज सुन प्रति औंस १७७३ डलर तथा चाँदी प्रतिऔंस २१.५८ डलरमा कारोबार भइरहेको छ ।