०३ चैत, काठमाडौं । नेपालमा केही दिनयता स्थानीय वायुसँगै पश्चिमी वायुको सामान्य प्रभाव रहेको जल तथा मौसम विज्ञान विभागले जनाएको छ ।
स्थानीय वायुको प्रभावले हावाहुरी, मेघगर्जन र चट्टयाङ्गसहित ठूलो वर्षा हुने भए पनि यो वर्ष अहिलेसम्म ठूलो वर्षा भएको छैन ।
“स्थानीय वायुको प्रभावले ठूलो वर्षा हुन्छ । तर, यो वर्ष आजसम्म धेरै ठूलो वर्षा हुन सकेको छैन,” मौसमविद् राजु प्रधानाङ् भन्छन्, “तत्काल अझै ठूलो वर्षाको सम्भावना छैन । अझै कम्तीमा तीनदिन ठूलो पानी पर्ने सम्भावना मौसमी प्रणालीमा देखिएको छैन ।”अहिले प्रि–मनसुन चलिरहेको छ ।
आज दिउँसो देशका पहाडी भू–भागका केही स्थानमा मेघगर्जन र चट्टयाङ्गसहित हल्का वर्षाको सम्भावना रहेको छ । विभागका अनुसार पहाडी भू–भागमा आंशिकदेखि सामान्य बदली रही बाँकी भू–भागको मौसम सामान्यतया सफा रहने छ ।
यस्तै आज राति देशको पहाडी भू–भागमा आंशिक बदली रही बाँकी भू–भागको मौसम सामान्यतया सफा रहने छ । देशको पहाडी भू–भागको केही स्थानमा मेघगर्जन र चट्टयाङ्गसहित हल्का वर्षाको सम्भावना रहेको छ ।
मेघगर्जन, चट्टयाङ्ग र हावाहुरीसहित हल्का वर्षाको सम्भावना रहेकाले आवश्यक सतर्कता अपनाउन विभागले आग्रह गरेको छ ।
यसैबीच, काठमाडौंको आजको न्यूनतम तापक्रम १०.६ डिग्री सेल्सियस रहेको छ । दिउँसो बढेर २५–२७ डिग्री सेल्सियस पुग्ने सम्भावना रहेको मौसमविद् प्रधानाङ्ले जानकारी दिए ।
उनका अनुसार आज काठमाडौंको मौसम दिनभर बदली हुने छ ।