१४ जेठ, काठमाडौं । सरकारले कृषि उत्पादनमा टेवा पुर्याउन भन्दै वर्षेनि अर्बौं रुपैयाँ अनुदान दिने गरको छ । तर, त्यसको नतिजा व्यवहारमा देखिएको छैन ।
महालेखा परीक्षकको कार्यालयको ६१औं वार्षिक प्रतिवेदनले उक्त विषय उजागर गरेको छ । प्रतिवेदन अनुसार आर्थिक वर्ष २०७९/८० मा सरकारले रासायनिक मलमा ३१ अर्ब २० करोड ३३ लाखसहित कुल ३६ अर्ब ४ करोड ३४ लाख अनुदान दिएको थियो ।
तर, सोही वर्ष कृषिजन्य वस्तु आयातमा १ खर्ब ५१ अर्ब ६ करोड रुपैयाँ खर्च भएको छ । कृषिजन्य वस्तु आयात अघिल्लो वर्ष २०७८/७९ को तुलनामा १७.९८ प्रतिशतले वृद्धि भएको छ ।
उक्त वर्ष १ खर्ब २८ अर्बको कृषिजन्य वस्तु आयात भएको थियो । नेपालका तीन वटै सरकारले कृषिजन्य सामग्रीको आन्तरिक उत्पादन वृद्धि गर्न ठूलो लगानी गरिरहे पनि नतिजा नदेखिएको महालेखाको भनाइ छ ।
कृषि क्षेत्रमा दिने अनुदान हरेक वर्ष बढ्दै गए पनि आयात बढिरहेको देखिएको छ । महालेखाले कृषि नीति तथा कार्यक्रम पुनरावलोकन गरी आत्मनिर्भर कार्यक्रम ल्याउन सुझाव दिएको छ ।