१९ वैशाख, काठमाडौं । गीतकार ज्योति कोइरालाले ८६ वर्षको उमेरमा आफ्नो पहिलो गीत संग्रह सार्वजनिक गरेकी छन् ।
मौलिक लयमा आधारित पाँचवटा गीत समावेश एल्बम ‘ज्योतिको सँगालो’को बुधबार काठमाडौंमा आयोजित कार्यक्रममा पूर्वप्रधानन्याधीश एवं मन्त्रिपरिषद्का पूर्वअध्यक्ष खिलराज रेग्मी, वरिष्ठ मुटुरोग विशेषज्ञ डा. भगवान कोइराला, लोकगायक बमबहादुर कार्कीले विमोचन गरे ।
विन्ध्यवासिनी म्युजिकले ल्याएको गीति संग्रहको एक गीतको भिडियो समेत उक्त अवसरमा सार्वजनिक गरिएको थियो । एल्बमका सबै गीतमा दीपक शर्माको संगीत छ ।
कार्यक्रममा गीतकार कोइरालाले सात दशअघिको परिवेशलाई यसमा समेटिएको बताइन् । कोइराला दम्पतीले डा. भगवान कोइरालाको अगुवाइमा निर्माण भइरहेको बाल अस्पतालका २५ लाख रुपैयाँ सहयोग रकम समेत हस्तान्तरण गरे ।