२८ बैशाख, काठमाडौं । आजकाल नयाँ बाइक वा स्कुटर स्टार्ट हुने बित्तिकै हेडलाइट बल्छ । यसलाई बन्द गर्ने कुनै स्विच पनि हुँदैन । यसका लागि छुट्टै स्विच राख्नु पर्छ । यो परिवर्तन अप्रिल १, २०१७ पछि गरिएको हो । सवारीसाधनको बत्तीलाई हाई वा लो बिममा परिवर्तन गर्न सकिने भए पनि पूर्ण रूपमा बन्द गर्ने विकल्प छैन ।
कतिले त यसले ब्याट्री डिस्चार्ज हुनबाट बचाउने विश्वास पनि गरेको पाइन्छ । साथै, धेरैले हेडलाइट सधैँ बल्ने भएकाले बाइकको माइलेज कम हुने अनुमान समेत गर्छन् ।
यसलाई डे टाइम रनिङ लाइट अर्थात डीआरएल भनिन्छ । यो प्रविधि अहिले धेरै नयाँ मोडलका बाइकमा आएको छ । दिनको समयमा चलाउदा पनि यो बलिरहेको देखिन्छ ।
बाइक वा स्कुटर स्टार्ट हुने वित्तिकै हेडलाइट बल्नुको मुख्य कारण दुई पाङ्ग्रे सवारी साधनको भिजिबिलिटी बढाउनु हो । यसले सडकमा हुने सवारी दुर्घटनालाई न्यूनीकरण गर्न मद्दत गरेको हुन्छ ।
सडकमा साना सवारीको भिजिबिलिटी कम हुन्छ । जसले खराब मौसम वा कुहिरोका कारण साना सवारीसाधनलाई सजिलै देख्न सकिदैन । यस्तो अवस्थामा सवारीसाधन आपसमा ठोक्किने सम्भावना बढेको हुन्छ । तर, बाइकको हेडलाइट बलिरहेको छ भने यसको भिजिबिलिटी कायम रहन्छ र टाढाबाट पनि सजिलै देख्न सकिन्छ ।
धेरैलाई यो लाग्न सक्छ कि यस्तो फिचरले बाइकको धेरै ब्याट्री खपत हुन्छ, जसका कारण ब्याट्री चाँडै बिग्रन थाल्छ र बारम्बार परिवर्तन गर्नुपर्ने हुन्छ । तर यसले बाइकको ब्याट्रीमा असर नपर्ने विज्ञहरूको भनाइ छ ।
आजकालका नयाँ बाइकमा एड्भान्स ब्याट्री प्रविधि र अल्टरनेटिभको प्रयोग भइरहेको छ, जसका कारण लोड बढ्दा पनि ब्याट्रीमा असर पर्दैन । यसले बाइकको माइलेजलाई पनि असर पार्दैन । अब धेरै बाइक एलईडी डीआरएलका साथ आउन थालेको छ । यो हेडलाइट भन्दा कम पावर खपत गर्छ र टाढाबाट पनि देख्न सकिन्छ ।