२६ बैशाख, केप टाउन (एजेन्सी) । कोरोनाभाइरसको इन्डियन भेरिएन्ट दक्षिण अफ्रिकासम्म फैलिएको छ । दक्षिण अफ्रिकाको स्वास्थ्य मन्त्रालयले बताए अनुसार यहाँ भारतमा तिव्र रुपमा फैलिएको नयाँ भेरिएन्टबाट दक्षिण अफ्रिकामा चार जना नयाँ संक्रमित भेटिएका छन् ।
‘बी. १. ६१७. २ का चारवटा केस हामीकहाँ भेटिएका छन् । र ती सबैको इतिहास हालै भारतबाट आएको देखिएको छ,’ स्वास्थ्य मन्त्री जेली खिजले शनिबार एक विज्ञप्तिमा भनेका छन् । गत महिना बेलायतबाट फैलिएको नयाँ भेरिएन्टका केसहरु दक्षिण अफ्रिकामा कायमै रहँदा भारतबाट सुरु भएको भेरिएन्टका बिरामी पनि भेटिएका हुन् ।
कोरोनाको नयाँ भेरिएन्ट सबै भन्दा धेरै फैलिने अफ्रिकी मुलुकमध्ये दक्षिण अफ्रिका पनि एक हो । केन्या, युगान्डा र मोरक्कोसँगै दक्षिण अफ्रिका पनि धेरै संक्रमण फैलिने अफ्रिकी देशमै पर्छ ।
यद्यपि दक्षिण अफ्रिकाले भारतसँगको उडानमा प्रतिबन्ध लगाएको छैन । हालसम्म दक्षिण अफ्रिकामा कोरोना संक्रमितको संख्या १५ लाख भन्दा धेरै छ । तीमध्ये ५४ हजार ७ सयको मृत्यु भइसकेको छ ।