१९ चैत, काठमाडौँ । सातको अन्तिम कारोबार दिन बिहीबार पनि सेयर बजार बढेर बन्द भएको छ । बुधबार २६१९.०३ अंकमा बन्द भएको नेप्से आज १२.८८ अंकले वृद्धि भएर २६३१.९० अंकमा बन्द भएको छ । नेप्सेसँगै कारोबार रकममा पनि बढोत्तरी भएको छ ।
आज नेप्सेमा ७ अर्ब २५ करोडको ९ लाख २४ हजारको कारोबार हुँदा १ करोड ४३ लाख ९० हजार ४७७ कित्ता सेयर किनबेच भएको छ । बुधबार बजारमा ६ अर्ब १६ करोडको कारोबार भएको थियो ।
बिहीबार नेप्सेले कायम गरेको तेस्रो उच्च विन्दु हो । यसअघि, गएको फागुन ९ गते नेप्से २४०.३५ अंकको ऐतिहासिक उचाइमा पुगेको थियो भने फागुन ६ गते २६३६.६८ अंक रहेको थियो । फागुन ९ गते ऐतिहासिक उचाइमा पुगेर घट्न लागेको नेप्से चैत २ गते २३८९.१९ अंकसम्म झरेको थियो ।
बिहीबार प्रि ओपन सेसनमा नै साढे २६ अंकले वृद्धि भएर २६४५.५ अंकमा खुले पनि इन्ट्रा डे कारोबारमा सोही विन्दुलाई उच्च विन्दु कायम गर्दा २६१५.२६ अंकको तल्लो विन्दु कायम गरेको छ ।
होटेल तथा पर्यटन, लघुवित्त, जीवन बिमा, म्युचुअल फन्ड र लगानी उपसूचकबाहेक सबैमा हरियाली छाउँदा अन्य उपसूचक ३.३५ प्रतिशतले बढेर बजारलाई लिड गरेको छ । यस्तै, विकास बैंक उपसूचक १.७७ प्रतिशत र बित्त कम्पनी उपसूचक १.७० प्रतिशत, व्यापार उपसूचक १.५५ प्रतिशतले वृद्धि हुँदा बजारलाई लिड गर्ने बैंकिङ उपसूचक ०.२५ प्रतिशतले बढेको छ ।
यता, होटेल तथा पर्यटन उपसूचक भने सर्वाधिक १.८८ प्रतिशत र लगानी उपसूचक १.१८ प्रतिशतले घटेको छ । बजार परिसूचकसँगै बिहिबार कारोबार रकम पनि बढेको छ ।
आज नेप्सेमा कारोबार रकममा अपर तामोकोसीले लिड गरेको छ । अपर तामाकोसीको ३० करोड २२ लाख ७३ हजारको कारोबार हुँदा, जलविद्युत् लगानी तथा विकास कम्पनी (एचआइडीसीएल)को २४ करोड ४० लाख ३३ हजार र अपी पावरको २४ करोडको कारोबार भएको छ ।
बिहीबार नेप्सेमा कारोबार भएका ७ कम्पनीको सेयर मूल्यमा सकारात्मक सर्किट लागेको छ । सेयर मूल्यमा सकारात्मक सर्किट लाग्ने कम्पनीमा सान्जेन जलविद्युत् कम्पनी, युनाइटेड फाइनान्स, किसान लघुवित्त, वोमी लघुवित्त, एनआईसी एशिया लघुवित्त, अजोड इन्स्योरेन्स र युनाइटेड फाइनान्स रहेका छन् ।
यता, सेयर मूल्य घट्नेमा भने एचआईडीसीएल अगाडि छ । कम्पनीको सेयर मूल्य ५.५३ प्रतिशतले घट्दा सानिमा जनरल इन्स्योरेन्सको ३.९९ प्रतिशत र चन्द्रागिरि हिल्सको ३.३ प्रतिशतले मूल्य घटेको छ । आज कारोबार भएको सूचीकृत कम्पनीमा ९७ कम्पनीको सेयर मूल्य बढेको छ भने ६७ कम्पनीको घटेको छ र १६ कम्पनीको मूल्य भने स्थिर छ ।