कारागारबाट भागेका १४ हजार बढी कैदीबन्दीमध्ये आठ हजार फर्किए, छ हजार बढी अझै फरार

१० असाेज, काठमाडौँ । गत भदौ २४ गतेको जेनजी आन्दोलन का क्रममा देशका २८ वटा कारागार र नौ वटा सुधारगृहबाट भागेका १४ हजार ५४९ जना कैदीबन्दीमध्ये हालसम्म आठ हजार ५४ जना कारागारमा फर्किएका छन्।

कारागार व्यवस्थापन विभागका निर्देशक चोमेन्द्र न्यौपानेका अनुसार फर्किएकाहरूमध्ये कारागारबाट भागेका ७ हजार ७१३ र सुधारगृहबाट भागेका ३४१ जना रहेका छन्। यीमध्ये कतिपय कैदीबन्दीहरू आफैँ कारागार फर्किएका हुन् भने कतिपयलाई सुरक्षाकर्मीले पक्राउ गरी ल्याइएको हो।

विभागका अनुसार, आन्दोलनका क्रममा भागेका कुल कैदीबन्दीमध्ये ६ हजार ४९४ जना अझै फरार छन्। फरार हुनेमा कारागारबाट भागेका ५ हजार ८७२ र सुधारगृहबाट भागेका ६२२ जना रहेका छन्। निर्देशक न्यौपानेले फरार रहेका सबै कैदीबन्दीको खोजी कार्य जारी रहेको बताएका छन्।

भदौ २४ गतेको आन्दोलनका क्रममा कारागारबाट १३ हजार ५८५ र सुधारगृहबाट ९६४ कैदीबन्दी भागेका थिए। यसबीचमा १० जना कैदीबन्दीको भने मृत्यु भएको छ। कूल ३० हजार ६४६ कैदीबन्दी रहेकामा हाल २३ हजार ४४६ जना कारागारमा रहेका छन्।