Advertisement

जापानी कम्पनीले बनायो विद्युतीय चम्चा, नुनको सेवन कम गर्न मद्दत गर्ने

0 7

Advertisement

२० जेठ, एजेन्सी । भान्सामा प्रयोग हुने विभिन्न घरायासी विद्युतीय सामानहरू बजारमा उपलब्ध छन्, जसले हाम्रो दैनिकीलाई सहज बनाइरहेको छ । तर, अहिलेसम्म विद्युतीय चम्चा भने आएको थिएन । अब चाहिं यो रिक्तता पनि पूरा भएको छ ।

एक जापानी कम्पनीले विद्युतीय चम्चा उत्पादन गरी बिक्री सुरु गरेको छ । प्रसिद्ध जापानी पेय पदार्थ कम्पनी किरिन होल्डिंग्सले विद्युतीय चम्चाको बिक्री सुरु गरेको हो ।

यो विद्युतीय चम्चाले खानामा अधिक सोडियमको मात्रालाई नियन्त्रण गर्न मद्दत गर्नेछ र यसले अतिरिक्त सोडियम बिना नै नुनको स्वादलाई कायम राखिदिनेछ । अर्थात् यसले स्वस्थ भोजनलाई बढावा दिनेछ।

यही सोमबार कम्पनीले विद्युतीय चम्चा लञ्च गरेको हो । यो चम्चाले गत वर्ष आइजी नोबेल पुरस्कार समेत प्राप्त गरेको थियो ।

किरिन कम्पनीले १९ हजार ८०० जापानी येन अर्थात् करिब १७ हजार नेपाली रुपैयाँमा हाल केवल २ सयवटा विद्युतीय नुन चम्चा अनलाइनमा बेच्नेछ। केही थप चम्चाको बिक्री जुन महिनामा हुनेछ । आगामी पाँच वर्षभित्रमा १० लाख ग्राहकलाई विद्युतीय चम्चा बिक्री गर्ने कम्पनीको योजना छ ।

जापान बाहिर अन्तर्राष्ट्रिय बजारमा आगामी वर्षदेखि यो चम्चाको बिक्री सुरु गरिने कम्पनीले जनाएको छ ।

प्लास्टिक र धातुबाट बनेको यो चम्चालाई कम्पनीले मिजी विश्वविद्यालयका प्राध्यापक होमी मियाशितासँग मिलेर तयार पारेको हो । उनले यसअघि यस्तो प्रोटोटाइप विद्युतीय चपस्टिक बनाएका छन् जसले खानाको स्वाद बढाइदिन्छ ।

कम्पनीले तयार पारेको पछिल्लो विद्युतीय चम्चाले खानामा अतिरिक्त नुन नथपिकनै नुनिलोपनाको स्वाद बढाउन सहयोग गर्दछ । यसले जिब्रोमा निकै मन्द विद्युतीय क्षेत्र सिर्जना गर्दछ ।

स्मरण रहोस् किरिन कम्पनीले हालसम्म बियरको व्यापार गर्दै आएकोमा अहिले स्वास्थ्यसम्बन्धी प्रडक्टहरुको उत्पादनमा ध्यान दिन थालेको छ ।

मनिसमा अधिक नुन सेवनको बानीलाई कम गर्ने यस्तो प्रविधियुक्त चम्चा जापानमा निकै उपयोगी र लाभदायी हुने विश्वास कम्पनीको छ ।

जापानमा प्रौढ मानिसहरुले औसतमा दैनिक १० ग्रामसम्म नुन सेवन गर्दछन् । यो भनेको विश्व स्वास्थ्य संगठनको मापदण्डभन्दा दोब्बर बढी हो । नुनसँगै अधिक सोडियमको सेवनले मानिसमा उच्च रक्तचाप, हृदयाघात लगायतका विभिन्न स्वास्थ्य समस्या देखिन्छन् ।

किरिन कम्पनीमा काम गर्ने शोधकर्ता आइ सातो भन्छन्- जापानको एउटा खाना संस्कृति छ, जसमा नुनको स्वादलाई मन पराइन्छ । जापानीहरुमा समग्र रुपमा नुनको सेवन घटाउनु आवश्यक छ तर हामीमा जुन खानपानको बानी छ त्यसबाट टाढा हुन कठिन छ । यस्तो अवस्थाले नै गर्दा हामीलाई यो विद्युतीय चम्चाको विकास गर्न प्रेरित गरेको हो ।

६० ग्राम तौल भएको यो चम्चामा रिचार्जेबल लिथियम ब्याट्रीको प्रयोग गरिएको छ ।



मल्टिमिडिया ग्यालरी


© Nepali horoscope

Comments

comments

Subscribe to our newsletter
Sign up here to get the latest news, updates and special offers delivered directly to your inbox.
You can unsubscribe at any time
Leave A Reply

Your email address will not be published.