बनेपामा आजदेखि बृहत कृषि महोत्सव हुँदै, राष्ट्रपतिले उद्घाटन गर्ने
Advertisement
०४ फागुन, बनेपा । काभ्रेको बनेपामा आजदेखि ‘बृहत कृषि महोत्सव’ को आयोजना गरिने भएको छ । महोत्सवको आज राष्ट्रपति रामचन्द्र पौडेलले उद्घाटन गर्ने कार्यक्रम रहेको छ । यसका लागि सम्पूर्ण तयारी भएको आयोजकले जनाएको छ ।
जिल्ला समन्वय समिति, कृषि ज्ञान केन्द्र धुलिखेल र भेटेरिनरी अस्पताल तथा पशु सेवा विज्ञ केन्द्रको संयुक्त आयोजना, काभ्रे उद्योग वाणिज्य सङ्घको आर्थिक व्यवस्थापन, जिल्लास्थित स्थानीय तहको प्रत्यक्ष सहभागितामा मेला हुन लागेको हो । जिल्लाका कृषकले उत्पादन गरेका कृषि तथा पशुजन्य उपजको प्रदर्शनी तथा बजारीकरण गरी उनीहरूको आर्थिक अवस्थामा सुधार ल्याउने उद्देश्यले आजदेखि ७ गतेसम्म बनेपास्थित करुणा मार्गमा बृहत कृषि महोत्सवको आयोजना हुने भएको हो ।
महोत्सवले कृषि क्षेत्रमा भएको उत्पादनको बजारीकरण, नयाँ प्रविधिबारे जानकारी प्रदान गर्नुका साथै व्यवसायिक कृषि पेसामा आबद्ध हुनका लागि नागरिकलाई उत्प्रेरित गर्ने अपेक्षा गरिएको ज्ञान केन्द्रले जनाएको छ । केन्द्रका प्रमुख कुलप्रसाद दवाडीका अनुसार महोत्सवमा अन्नबाली, दलहन बाली, नगदेबाली, फलफूल, तरकारी, मसला बाली, च्याउ बाली, महलगायत स्थानीय कृषि उपज तथा उत्पादनहरू समावेश गरिने छ ।
यसैगरी, महोत्सवमा उत्पादन र प्रशोधनसँग सम्बन्धित उपकरणहरू, उच्च प्रविधियुक्त संरचनामा आधारित उत्पादन सामग्री, जैविक मल, प्राङ्गारिक मल, रैथाने उत्पादन तथा परिकारका प्रदर्शनी कक्ष राखिने जनाएको छ । महोत्सवमा कृषि क्षेत्रमा आएका प्रविधि र विभिन्न सवालका विषयमा प्राविधिक गोष्ठी, वित्तीय साक्षरतासम्बन्धी गोष्ठी, कृषकका रैथाने प्रविधिहरूको प्रदर्शन, उन्नत बीउबिजन, यन्त्र, औजार, उपकरण अन्य सामाग्रीको बिक्री–वितरण, स्थलगत बाली तथा माटो शिविरको आयोजना गरिनेछ ।
महोत्सवबाट कम्तीमा एक सय व्यवसायिक फर्म स्थापना हुने, बेरोजगार युवा व्यवसायिक कृषितर्फ आकर्षित हुने, कृषि उपजको बजारीकरण भई आयमा वृद्धि हुने, उन्नत एवं हाइब्रिड जातको बीउको प्रयोग तथा उत्पादनमा वृद्धि तथा विदेशबाट फर्केका युवाको कृषितर्फ आकर्षण एवं व्यवसायिकतामा अभिवृद्धि हुने अपेक्षा गरिएको छ । केन्द्रका अनुसार महोत्सवका लागि एक करोड १५ लाख खर्च हुने प्रारम्भिक अनुमान छ ।
Comments
