०४मंसिर, काठमाडौं । इजिप्टले गाजा पट्टीको युद्धग्रस्त प्यालेस्टिनी एन्क्लेभमा सहायता बोकेका १९० भन्दा बढी ट्रकहरू पठाएको छ। इजिप्टको ताह्या मिस्र कोषले उपलब्ध गराएको २ हजार ५०० टन सहायता प्याकेज बोकेका ट्रकहरु रफाह सीमा नाका हुँदै गाजा प्रवेश गर्नेछन्।
इजिप्टको राजधानी कायरोमा आयोजित उद्घाटन समारोहमा इजिप्टका प्रधानमन्त्री मोस्तफा मदबोलीले गाजामा हालसम्म २ तिहाइभन्दा बढी सहयोग इजिप्टबाट पठाएको बताए।
इजरायलले अक्टोबर ७ मा गाजा–सत्ताधारी हमास लडाकूहरूको नेतृत्वमा भएको आक्रमणको बदलास्वरूप गाजा पट्टीमा आक्रमण गरिरहेको छ। हमासको आक्रमणबाट इजरायल क्षेत्रमा १ हजार २०० जना मारिएका छन्। हमास समूहले २०० भन्दा बढी व्यक्तिलाई बन्धक बनाएको छ।
हमास समूहको आक्रमणबाट १० जना नेपाली विद्यार्थी समेत मारिएका थिए। १ जना नेपाली विद्यार्थी अझै हमास समूहको कब्जामा छन्।
जारी द्वन्द्वले तटीय एन्क्लेभमा १२ हजार प्यालेस्टाइनीहरूको मृत्यु भएको छ। गाजा पट्टीमा पानी, बिजुली, इन्धन र अन्य आवश्यक सामग्रीको आपूर्ति बन्द गरिएको छ। अक्टोबर २१ देखि इजिप्टबाट राफा क्रसिङ हुँदै प्यालेस्टिनी एन्क्लेभमा सीमित मानवीय सहायतालाई अनुमति दिइएको छ।
Comments
