Advertisement
२९ असाेज, काठमाडौं । बलिउड अभिनेता सनी देओल आफ्नो आगामी फिल्मलाई लिएर लगातार चर्चामा रहन्छन् । आमिर खानसँगको ‘लाहोर १९४७’ र ‘पुष्पा’का निर्मातासँगको शीर्षकविहीन फिल्मपछि उनको अर्को फिल्मलाई लिएर अपडेट छ ।
यो भनेको लामो समयदेखि चर्चामा रहेको फिल्म ‘बोर्डर २’ हो । मिडिया रिपोर्ट र फिल्मसँग सम्बन्धित स्रोतका अनुसार सनी देओलले यस फिल्मको पारिश्रमिक ५० करोड भारु पाउनेछन् ।
यति मात्र होइन, सनीले यो फिल्मका निर्मातासँग नाफा पनि बाँड्नेछन् । निर्देशक जेपी दत्त र भुषण कुमारले यो फिल्मलाई संयुक्त रुपमा निर्माण गर्नेछन् ।
बलिउड हंगामाको रिपोर्ट अनुसार फिल्मसँग सम्बन्धित एक स्रोतले सनीले फिल्मको लागि ५० करोड भारु अग्रिम शुल्क लिनेछन् । यसबाहेक उनीहरुसँग ब्याक एण्ड डिल पनि गरिने छ जसमा उत्पादकले उनीहरुसँग नाफा बाँड्नेछन् ।
सनीको उपस्थितिले फिल्मलाई नयाँ उचाइमा पुर्याउने विश्वास फिल्मसँग सम्बन्धित व्यक्तिको छ । सनीसँगको यो सम्झौताबाट निर्माता निकै खुसी छन् ।
यसअघि एक भारतीय युट्युबरलाई दिएको एक अन्तर्वार्तामा जब सनीलाई यो फिल्मको बारेमा सोधिएको थियो,’ उनले भनेका थिए, ‘मैले यो फिल्ममा काम भइरहेको सुनेको छु । वास्तवमा हामीले यो धेरै पहिले गर्न गइरहेका थियौं । मलाई लाग्छ सन् २०१५ मा । तर त्यतिबेला मेरो कुनै पनि फिल्मले राम्रो प्रदर्शन गर्न सकेन, त्यसैले मानिस डराए र यो फिल्म बनाउन चाहँदैनथे ।’
‘बोर्डर २’ लाई जेपी दत्तले निर्देशन गर्ने चर्चा छ । फिल्ममा सनीसहित आयुष्मान खुराना, एमी विर्क र अहान शेट्टीजस्ता कलाकार पनि देखिनेछन् । छायांकन सन् २०२४ को अन्त्यतिर सुरु हुनेछ । यसपटक पनि यसको कथा भारत–पाकिस्तान युद्धमा आधारित हुनेछ ।
सन् १९९७ मा रिलिज भएको ‘बोर्डर’ बक्स अफिसमा निकै हिट साबित भयो । यो फिल्मले चारवटा राष्ट्रिय चलचित्र पुरस्कारसहित धेरै अवार्ड जित्यो । यसको कथावस्तु १९७१ को भारत–पाक युद्धमा आधारित थियो । उक्त फिल्ममा देओल, ज्याकी श्राफ, सुनील शेट्टी, अक्षय खन्ना, पूजा भट्ट र तब्बु लगायतको अभिनय छ ।
बोर्डरसहित सनीले गदर, द हिरो, माँ तुझे सलाम र गदर २ जस्ता देशभक्तिपूर्ण फिल्म पनि गरेका छन् । यी सबै फिल्म बक्स अफिसमा हिट भएका थिए ।
Comments
