सेयर बजारमै लगानी गर्ने हाथवे इन्भेष्टमेन्टको आईपीओ, कम्पनी लगातार नाफामा

0 9

२२ भदौ, काठमाडौं । विशिष्टीकृत रुपमा सेयरबजारमै लगानी गर्ने कम्पनीको पहिचान बनाएको हाथवे इन्भेष्टमेन्ट कम्पनी आफैंले प्राथमिक निष्कासन गरिरहेको छ । इमर्जिङ नेपाल र एनआरएन इन्फ्रास्ट्रक्चर एण्ड डेभलमेन्ट लिमिटेडपछि सर्वसाधारणलाई प्राथमिक सार्वजनिक निष्कासन गर्ने यो तेस्रो इन्भेष्टमेन्ट कम्पनी बनेको हो ।

कम्पनीले पहिलो चरणमा वैदेशिक रोजगारीमा रहेका नेपालीहरुलाई आईपीओ निष्कासन गरी बाँडफाँट गरीसकेको छ । अब दोस्रो चरणमा २१ भदौ सोमबारदेखि सर्वसाधारणलाई आईपीओमा आवेदन माग गरेको हो ।

नेपालमा सार्वजनिक निष्कासन गर्ने कम्पनीले सामान्यतः १ सय रुपैयाँ अंकित मूल्य राख्ने प्रचलन छ । नेप्सेमा सूचीकृत कम्पनीहरुमा सोल्टी होटल बाहेक सबै कम्पनीको अंकित मूल्य १०० रुपैयाँ छ भने सोल्टी होटलको प्रतिसेयर अंकित मूल्य १० रुपैयाँ छ । हाथवे इन्भेष्टमेन्टको सेयरको अंकित मूल्य ५० रुपैयाँ प्रतिकित्ता रहेको छ ।

कम्पनीले जारी पूँजी १ अर्ब १७ करोड रुपैयाँको १२.५० प्रतिशतले हुन आउने १४ करोड ६२ लाख ५० हजार रुपैयाँ बराबरको २९ लाख २५ हजार कित्ता साधारण सेयर निष्कासन गर्ने अनुमति नेपाल धितोपत्र बोर्डबाट पाएको छ ।

त्यसमध्ये कम्पनीले वैदेशिक राजगारीमा रहेका नेपालीलाई सार्वजनिक निष्कासन गर्ने स्वीकृति पाएको सेयरको १० प्रतिशतले हुने १ करोड ४६ लाख २५ हजार रुपैयाँ बराबरको २ लाख ९२ हजार ५०० कित्ता सेयर निष्कासन गरी बाँडफाँट गरिसकेको छ । यस्तै कम्पनीले २९ लाख २५ हजार रुपैयाँ बराबरको ५८ हजार ५०० कित्ता सेयर कर्मचारीहरुका लागि र ७३ लाख १२ हजार ५०० रुपैयाँ बराबरको १ लाख ४६ हजार २५० कित्ता सेयर सामूहिक लगानी कोषका लागि सुरक्षित गरेको छ । बाँकी रहेको १२ करोड १३ लाख ८७ हजार ५०० रुपैयाँ बराबरको २४ लाख २७ हजार ७५० कित्ता सेयर सर्वसाधारणका लागि निष्कासन खुला गरेको हो ।

कस्तो कम्पनी हो हाथवे ?

कम्पनीले १४ चैत २०६५ मा नेपाल सरकार, कम्पनी रजिष्ट्रारको कार्यालयमा दर्ता भई सोही मितिदेखि आफ्नो कारोबार सञ्चालन गर्दै आएको छ । कम्पनीले पूँजी बजारको अतिरीक्त जलविद्युत, रियल इस्टेट, आर्थिक, पर्यटन र स्वः पूँजीको क्षेत्रमा लगानी विस्तार गरिरहेको छ ।

कम्पनीको हाथवे स्टक डिलर नामको सहायक कम्पनी पनि सञ्चालनमा रहेको छ । उक्त स्टक डिलर १ साउन २०७८ मा कम्पनी रजिष्ट्रारको कार्यालयमा दर्ता भई आफ्नो कारोबार गर्दै आइरहेको छ । यस कम्पनीले हाल दोस्रो बजारमार्फत सूचीकृत धितोपत्रहरु खरीद तथा बिक्री गर्दै आइरहेको छ ।

कम्पनीको संस्थापक लगानीकर्ता को हुन् ?

कम्पनीको आधारभूत सेयरधनीमा आईएमई समूहमा आबद्ध लगानीकर्ताहरु छन् । आईएमई ग्रुपका प्रबन्ध निर्देशक हेमराज ढकाल कम्पनीको संस्थापक सेयरधनीमा छन् । यस्तै आईएमई ग्रुपको विभिन्न व्यवसायमा साझेदार रहेको सेयर लगानीकर्ता अम्बिका पौडेल पनि कम्पनीको आधारभूत सेयरधनी हुन् । हेमराज ढकालसँग मात्रै कम्पनीको ३०.१२ प्रतिशत अर्थात् ६१ लाख ६७ हजार ७६१ कित्ता सेयर रहेको छ । कम्पनीमा अम्बिका पौडेलको ८.६९ प्रतिशत अर्थात् १७ लाख ८० हजार २०० कित्ता सेयर रहेको छ ।

यस्तै कम्पनीको अर्को आधाभूत सेयरधनी निमिषा इन्भेष्टमेन्ट कम्पनी हो । निमिषा इन्भेष्टमेन्टको ५.६५ प्रतिशतले हुने ११ लाख ५७ हजार ८३० कित्ता सेयर छ । निमिषा इन्भेष्टमेन्टको सञ्चालक अञ्जली अर्याल हुन् । कम्पनीमा रुपन्देहीका कुमार पौडेलको २.३० प्रतिशत, काठमाडौंका सुमिति प्रधानको १.२६ प्रतिशत र काठमाडौंकै अम्बिका शर्मा लामिछानेको २.०९ प्रतिशत सेयर हिस्सा रहेको छ ।

यस्तै सुशील अर्यालको १.१८ प्रतिशत, गौरी श्रेष्ठको २.०९ प्रतिशत र प्रभु क्यापिटलको १.२२ प्रतिशत सेयर हिस्सा छ । मनिष ढकालको १.२१ प्रतिशत, लिना विष्टको १.४७ प्रतिशत, गौतमप्रसाद खनालको १.०५ प्रतिशत र शिवकुमार श्रेष्ठको १.६८ प्रतिशत सेयर हिस्सा छ । कम्पनीमा अध्यक्ष योगेश्वर शर्मा ढकालको १.०५ प्रतिशत सेयर हिस्सा छ ।

यस्तै एस. आर हाइड्रो एण्ड इन्भेष्टमेन्ट प्रालिको २८.०८ प्रतिशत सेयर छ । एसआर हाइड्रो एण्ड इन्भेष्टमेन्ट प्रालिका सञ्चालकहरुमा धादिङका नवराज नेपाल र उत्तमकुमार नेपाल छन् ।

कम्पनीको सञ्चालक समितिको अध्यक्षमा योगेश्वर शर्मा ढकाल छन् । सञ्चालक समितिका सदस्यहरुमा निमिष इन्भेष्टमेन्टका प्रतिनिधि सुरजकुमार श्रेष्ठ, कुमार पौडेल र जयराम नेपाल छन् । नेपाल एसआर हाइड्रो एण्ड इन्भेष्टमेन्ट प्रालिका तर्फबाट सञ्चालक हुन् ।

कम्पनीको व्यवस्थापनको नेतृत्व भने सन्दिप शाहले गरेका छन् । यस्तै सहायक प्रबन्धक तथा कम्पनी सचिव सुधा अर्याल र अनुसन्धान प्रमुख सुधिल श्रेष्ठ छन् । संस्थामा कुल ११ जना कर्मचारी छन् ।

कस्तो छ कम्पनीको अवस्था ?

कम्पनीले प्रकाशित गरेको विवरणपत्र अनुसार कम्पनी सञ्चित नाफामा सञ्चालन भइरहेको छ । आर्थिक वर्ष २०७८/७९ मा लेखापरीक्षण भएको वित्तीय विवरणमा कम्पनीको नाफा १९ करोड ५७ लाख ६७ हजार रुपैयाँ छ । कम्पनीको प्रतिसेयर आम्दानी ९ रुपैयाा ५६ पैसा र प्रतिसेयर नेतवर्थ ९५ रुपैयाँ ९ पैसा छ । यस्तै कम्पनीको सञ्चित नाफा ३८ करोड १७ लाख ८१ हजार छ । गत आर्थिक वर्ष २०७९/७८० को अपरिस्कृत वित्तीय विवरणमा कम्पनीको सञ्चित नाफा बढेर २७ करोड ९४ लाख ६ हजार र प्रतिसेयर आम्दानी १७ पैसा मात्रै छ । यस्तै प्रतिसेयर नेटवर्थ ८० रुपैयाँ ६३ पैसा छ ।

आर्थिक वर्ष २०७६/७७ मा कम्पनीको नाफा २ करोड ३४ लाख १ हजार हुँदा प्रतिसेयर नेटवर्थ ६४ रुपैयाँ १३ पैसा र प्रतिसेयर आम्दानी १ रुपैयाँ ४३ पैसा थियो । यस्तै कम्पनीको सञ्चित नाफा ३ करोड २८ लाख १४ हजार रहेको थियो । कोभिडपछि बढेको सेयर बजारले आर्थिक वर्ष २०७७/७८ मा कम्पनीले राम्रो मुनाफा आर्जन गर्न सफल भयो । कम्पनीले उक्त आर्थिक वर्षमा ५६ करोड २ लाख ६५ हजार मुनाफा आर्जन गरेको थियो, जसले गर्दा उक्त आर्थिक वर्षमा कम्पनीको प्रतिसेयर आम्दानी ३४ रुपैयाँ २ पैसा र प्रतिसेयर नेटवर्थ १२९ रुपैयाँ ५५ पैसा पुगेको थियो । साथै सञ्चित नाफा पनि ६३ करोड ६४ लाख ६४ हजार पुगेको विवरणपत्रमा उल्लेख छ ।
कम्पनीले आर्थिक वर्ष २०८१/८२ मा प्रतिसेयर नेटवर्थ ८८ रुपैयाँ १७ र प्रतिसेयर आम्दानी ५ रुपैयाँ ३१ पैसा हुने प्रक्षेपण गरेको छ । साथै सञ्चित नाफा ४४ करोड १३ लाख ८४ हजार पुग्ने कम्पनीको प्रक्षेपित वित्तीय विवरणमा उल्लेख छ । यस्तै आर्थिक वर्ष २०८२/८३ मा कम्पनीको सञ्चित नाफा ६१ करोड ९ लाख ४० हजार पुग्दा कम्पनीको प्रसेयर नेटवर्थ ९९ रुपैयाँ ७१ पैसा र प्रतिसेयर आम्दानी ७ रुपैयाँ २४ पैसा हुने प्रक्षेपण गरेको हो ।

कम्पनीले गत आर्थिक वर्ष ०७९/८० मा २ करोड ६८ लाख ९ हजार मुनाफा आर्जन गर्ने प्रक्षेपण गरेपनि प्रक्षेपण अनुसारको नाफा आर्जन गर्न सकेन । चालु आर्थिक वर्षमा १३ करोड ५१ लाख ६९ हजार र आगामी आर्थिक वर्ष २०८१/८२ मा १६ करोड ९५ लाख ५६ हजार मुनाफा आर्जन गर्ने प्रक्षेपण गरेको हो ।

आईपीओबाट संकलित रकम कहाँ लगानी हुन्छ ?

कम्पनीले विवरणपत्रमा कम्पनीको प्रबन्धपत्र तथा नियमावलीमा उल्लेख भएका उद्देश्यहरु अनुरुप गर्नु पर्ने कार्यहरुको लागि आवश्यक पूँजी संकलन गर्न आईपीओ जारी गरेको उल्लेख गरेको छ । सार्वजनिक निष्काशनमार्फत संकलित पूँजीको अधिकतम् सदुपयोग गरी आफ्नो लगानी विस्तार तथा व्यवसायको क्षमता बढाउन आवश्यक पर्ने पूँजीको व्यवस्था गर्नेसमेत कम्पनीले जनाएको छ । कम्पनीले आईपीओबाट संकलन हुने १४ करोड ६२ लाख ५० हजार रुपैयाँमध्ये ६ करोड जलविद्युत उत्पादन, प्रसारण तथा वितरण गर्ने कम्पनीहरुमा लगानी गर्ने बताएको छ ।

यस्तै ८ करोड ६२ लाख ५० हजार रुपैयाँ कम्पनीले आर्थिक पूर्वाधार, यातायात तथा सञ्चारसँग सम्बन्धित संगठित संस्थाको संस्थापक सेयरमा लगानी गर्ने विवरणपत्रमा उल्लेख गरेको छ ।

सेयर बजारमा लगानी

कम्पनीको लगानीको प्रमुख हिस्सा सेयरमा देखिएको छ । कम्पनीले विवरणपत्रमा प्रकाशित गरेको गत आर्थिक वर्ष २०७९/८० को तेस्रो त्रैमाससम्मको वित्तीय विवरण अनुसार २ अर्ब २५ करोड ४० लाखको कुल सम्पत्तीमा कम्पनीले १ अर्ब ७४ करोड ६३ लाख रुपैयाँ सेयरमा लगानी गरेको छ । यस्तै ३१ करोड ६१ लाख ५ हजार अन्य वित्तीय सम्पत्ति छ । कम्पनीले सेयरपूँजी १ अर्ब २ करोड ३७ लाख ५० हजार र जगेडा कोष ६२ करोड ७१ लाख ९४ हजार छ । त्यस्तै बैंक तथा वित्तीय संस्थाको दायित्व ४२ करोड ४० लाख ४८ हजार रुपैयाँ रहेको छ ।

कम्पनीको लगानीमा विविधिकरण भन्दा पनि सेयरमा ठूला लगानी रहेकोले सेयर बजार बढ्दा कम्पनीबाट प्रतिफल आउने र सेयर बजार घट्दा कम्पनीका प्रतिफल पाउने सम्भावना पनि कमजोर देखिन्छ ।

कम्पनीले आईपीओ निष्कासनका लागि गराएको रेटिङमा क्रेडिट रेटिङ संस्था ईक्रा नेपाल ‘इस्यूअर रेटिङ इक्रा एपी–आईआर त्रिपल बी माइनस’ प्रदान गरेको छ । जसले कम्पनीको आईपीओमा लगानी गर्नु मध्यमस्तरको क्रेडिट जोखिम रहेको जनाउँछ ।



मल्टिमिडिया ग्यालरी


© Nepali horoscope

Comments

comments

Subscribe to our newsletter
Sign up here to get the latest news, updates and special offers delivered directly to your inbox.
You can unsubscribe at any time
Leave A Reply

Your email address will not be published.