२३ जेठ, काठमाडौं । भारतमा हुने साफ च्याम्पियनसिपको लागि माल्दिभ्सले जापानमा अन्तिम तयारी गर्ने भएको छ ।
साफ च्याम्पियनसिपको १४औं संस्करण यही जुन ८ देखि जुलाई ४ सम्म भारतको बेंगलुरुमा हुँदैछ । त्यसको तयारीका लागि माल्दिभ्सको राष्ट्रिय टिम सोमबार जापान प्रस्थान गरेको छ । माल्दिभ्सले जापानमा १० दिन प्रशिक्षण गर्नेछ ।
माल्दिभ्सले दुई साताअघि देखि नै साफ च्याम्पियनसिपमा लागि घरेलु मैदानमै प्रशिक्षण सुरु गरेको थियो ।
मालेमा जुन ४ मा प्रशिक्षण सकिएपछि अन्तिम तयारीका लागि जापानमा गएको हो । साफअघि माल्दिभ्सले मैत्रीपूर्ण खेल खेल्ने प्रयास समेत गर्नेछ ।
माल्दिभ्सको टिम जापानबाटै मे १५ मा भारत आउने माल्दिभ्सको अनलाइन मिडिया राज्जी डट एमभीले जनाएको छ ।
माल्दिभ्सलाई इटालियन प्रशिक्षक फ्रान्सेस्को मोरिएराले प्रशिक्षण दिइरहेका छन् ।
माल्दिभ्सको शीर्ष डिभिजनको लिग धिवेही प्रिमियर लिगको तीन चरणको खेलपछि लिग स्थगित गर्दै साफ च्याम्पियनसिपको तयारी गरेको हो ।
माल्दिभ्सको अन्तिम टोलीमा त्यहाँका पाँच फरक क्लबबाट २३ खेलाडी छन् । धेरै जसो खेलाडी माजिया एस एण्ड आरसीबाट (१४ खेलाडी) छन् ।
साफ च्याम्पियनसिपमा माल्दिभ्स समूह बीमा छ । यस समूहमा लेबनन, बंगलादेश र भुटान छन् । समूह ए मा भारत, नेपाल, कुवेत र पाकिस्तान छन् ।
माल्दिभ्सले सन् २०१८ मा पछिल्लो पटक साफ च्याम्पियनसिप जितेको थियो ।
पछिल्लो पटक सन् २०२१ मा माल्दिभ्समै भएको साफमा भारत च्याम्पिसयन बन्दा नेपाल उपविजेता भएको थियो ।
Comments
