पिरुवा जहा पुग्ने बित्तीकै हुन्छ एसी कोठाकै अनुभुती
०६ जेठ,कैलाली। गर्मी छल्न चहानेहरुका लागि पिरुवा एक गन्तब्य स्थल बन्न सक्छ । जहा पुग्ने बित्तिकै एसी कोठामा बसेको अनुभुती हुने गरेको छ । उसो त जुनसुकै मौसममा बनभोज स्थलका लागि प्रख्यात बन्दै गएको पिरुवा गर्मी याममा बनभोज संगै गर्मी छल्ने ठाउको रुपमा समेत चिनिन थालेको छ । सिमसार जस्तै देखिने पानीका स–साना खोल्सा र बेदवासले छपक्कै ढाकिएका रुखहरुको शितल्ताले मानिसलाई चिसोको अनुभुती संगै गर्मी छल्न सहज हुने गरेको हो ।
कैलालीको बर्दगोरीया गाउपालिका वडा नम्बर २ कुम्भियामा रहेको बनभोज स्थल पिरुवा संरक्षण र ब्यवस्थापनको पर्खाईमा समेत रहेको छ । पछिल्लो समय बनभोज खान तथा गर्मी छल्न आउने मानिसहरुको भिड समेत लाग्ने गरेको पाईन्छ । यस क्षेत्रले पहाड र तराइलाई संयोजन गर्ने दृश्य त झनै मनमोहक लाग्ने गर्दछन । बनभोज स्थलको पुर्व पट्टी खेती योग्य जमिनलाई पहाडले घेरीएको उपत्यकाको दृश्य, उत्तर पट्टी रहेको हरीयाली फाटहरुको दृश्य र माथी डाडाबाट हेर्न सकिने सुन्दर गाउका दृश्यहरुले त झनै मानिसको मनै लोभ्याउने गरेका छन । पिरुवा क्षेत्र अथाह सम्भावना बोकेको क्षेत्र भएता पनि यसको विकास र बिस्तारका लागि स्थानीय सरकार तथा सरोकारवालाको ध्यान पुग्न सकेको छैन । जस अनुरुप यस क्षेत्रको सम्भावना संगै चुनौती र समस्याहरु पनि उत्तिकै रहेका छन ।
पिरुवा सामुदायिक वनले यसको सामान्य ब्यवस्थापन गर्न खोजेको भएपनि प्रभावकारी कामहरु भने गरेको देखिदैन । पिरुवामा जुनसुकै समयमा सहज रुपले गाडी पुग्न सक्ने बाटो निर्माण, गाडी पार्किङ स्थल निर्माण, फोहरको उचित ब्यवस्थापन, खानेपानीको राम्रो प्रबन्ध, बस्नका लागि प्राकृतीक बेन्च निर्माण लगायतका समस्याहरु प्रमुख देखिएका छन । बौनिया बजारबाट अनुमानित ५ किलो मिटरको दुरीमा रहेको पिरुवा बनभोज स्थलमा कुम्भिया गाउ वा बर्दगोरीया धाम हुदै जान सकिन्छ ।
सुन्दर शान्त र रमणीय स्थल हुदा हुदै पनि ओझेलमा परेको पिरुवा जनप्रतीनिधी आएपछी केही सुधार सहितको विकास हुन्छ की भन्ने जनताको अपेक्षा हाल सम्म पनि पुरा हुन सकेको छैन । स्थानीय सरकारले पिरुवालाई बिशेष बनभोज स्थलकै रुपमा विकास गर्ने भने पनि हाल सम्म कुनै योजनाहरु ल्याउन नसकेको स्थानीवासीको गुनासो छ । सोही क्षेत्रमा पिरुवा सिचाई आयोजनाको काम समेत शुरु भएकाले बनभोज स्थल नै बिस्थापित हुन सक्ने भन्दै थप ब्यवस्थापन गर्न नसकिएको वनकी अध्यक्ष जानकी चौधरी बताउनु हुन्छ । सिचाई आयोजनाले बजभोज स्थललाई बिस्थापित गर्ने अवस्था आएमा अर्को ठाउमा ब्यवस्थापन गर्ने बताईएको छ ।
यस क्षेत्रलाई पर्यटन गन्तब्य संगै आर्थिक उपार्जनको क्षेत्र संग पनि जोड्न सकिन्छ । स्थानीय सरकारले यसको उचित ब्यवस्थापन सहितको योजना ल्याएमा यस क्षेत्रमा अत्याधिक मात्रमा पाईने बेदबास बाट पनि थुप्रै आयस्रोत बढाउन सकिने देखिन्छ । यसले सरकारको आयस्रोत संगै धेरै मानिसहरुलाई स्वरोजगार समेत बनाउन सकिने अवस्था छ । प्रभावकारी योजना नहुदा हाल बेदवासहरु समेत सुकेरै खेर गईरहेको पाईन्छ । त्यसैले पिरुवालाई बनभोज स्थलको रुपमा मात्र नभई आर्थिक उपार्जनको क्षेत्र संग समेत जोडेर योजना बनाउन आवश्यक देखिन्छ ।