अचम्मको लाइसेन्स परीक्षा : पासलाई फेल र फेललाई पास,  प्रमुखसहित ९ जनाविरुद्ध भ्रष्टाचार मुद्दा दायर

0 285

०५ चैत, काठमाडौँ । अख्तियार दुरुपयोग अनुसन्धान आयोगले यातायात व्यवस्था कार्यालय पोखराका तत्कालीन निमित्त कार्यालय प्रमुख गोकुल शर्मा पौडेलसहित ९ जनाविरुद्ध विशेष अदालतमा मुद्दा दायर गरेको छ।

यातायात प्रमुख पौडेलसहित शाखा अधिकृतहरु हरिप्रसाद गौतम,भरतराज काफ्ले, प्रेम प्रसाद श्रेष्ठ, डिल्लीराम बराल, भरतमणि बराल,कम्प्युटर अधिकृत होमनाथ शर्मा, कम्प्युटर अपरेटर (करार) झलक पौडेल, कम्प्युटर अपरेटर (करार) मोहनमणि सुवेदीविरुद्ध भ्रष्टाचार आरोपमा अख्तियार दुरुपयोग अनुसन्धान आयोगले विशेष अदालतमा मुद्दा दायर गरेको हो।

२०७६ साल कार्तिक र मङ्सिर महिनामा सञ्चालन गरिएको सवारी चालक अनुमति पत्रको परीक्षामा अनुत्तीर्णलाई उत्तीर्ण गरेको अनुसन्धानबाट खुल्न आएपछि उनीहरुविरुद्ध भ्रष्टाचार आरोपमा मुद्दा दर्ता गराएको अख्तियारले जनाएको छ।

विभिन्न मितिमा सञ्चालन भएका विभिन्न वर्गका सवारी चालक अनुमति पत्रको प्रयोगात्मक परीक्षामा अनुत्तीर्ण तथा अनुपस्थित परीक्षार्थीहरुलाई उत्तीर्ण गराएको र उत्तीर्ण भएका परीक्षार्थीहरुलाई अनुत्तीर्ण गरी प्रयोगात्मक परीक्षाको परिणाम फेरबदल गरेको पाइएपछि मुद्दा दर्ता गरिएको अख्तियारका प्रवक्ता श्याम प्रसाद भण्डारीले जानकारी दिए।

सवारी चालक अनुमति पत्रको विभिन्न मितिमा लिएको विभिन्न वर्गका प्रयोगात्मक परीक्षामा फेल तथा अनुपस्थित भएका परीक्षार्थीहरुमध्ये १६६ जना परीक्षार्थीहरुलाई पास गराएको तथा २ जना प्रयोगात्मक परीक्षामा पास भएका परीक्षार्थीहरुलाई फेल गराइ जम्मा १६८ जना परीक्षार्थीहरुको प्रयोगात्मक परीक्षाको परिणाम फेरबदल गरेको देखिएको अख्तियारले जनाएको छ।

निमित्त कार्यालय प्रमुखसमेतले संलग्न कर्मचारीहरुलाई कुनै प्रकारको विभागीय कारबाही गरेको नदेखिएको हुँदा उनीहरुविरुद्ध भ्रष्टाचार निवारण ऐन, २०५९ को दफा १३ बमोजिमको कसुर ठहर गर्दै विशेष अदालतमा मुद्दा दायर भएको अख्तियारले जनाएको छ।



मल्टिमिडिया ग्यालरी


© Nepali horoscope

Comments

comments

Subscribe to our newsletter
Sign up here to get the latest news, updates and special offers delivered directly to your inbox.
You can unsubscribe at any time
Leave A Reply

Your email address will not be published.