सेवा प्रदायकहरुले विगत ५ वर्षमा कति रोयल्टी र फ्रिक्वेन्सी दस्तुर बुझाए?
०८ कार्तिक, काठमाडौं । नेपालका विभिन्न दूरसञ्चार तथा इन्टरनेट सेवा प्रदायकहरुले बुझाएको विगत ५ वर्षको रोयल्टी, ग्रामीण दूरसञ्चार विकास कोष तथा फ्रिक्वेन्सी दस्तुरको प्रवृत्ति मिश्रित रहेको पाइएको छ।
हालै नेपाल दूरसञ्चार प्राधिकरणले जारी गरेको वार्षिक प्रतिवेदन अनुसार फ्रिक्वेन्सी दस्तुर घट्ने-बढ्ने हिसाबले अघि बढेको छ भने ग्रामीण दूरसञ्चार विकास कोषको रकम अलिलि बढ्दै गएर अन्त्यमा घटेको पाइएको छ।
यसै क्रममा रोयल्टी रकमको प्रवृत्ति भने समग्रमा घट्दो क्रममा गएको देखिन्छ।
यी सेवा प्रदायकहरुले विगत ५ वर्ष अर्थात् आर्थिक वर्ष २०७२/७३ देखि २०७६/७७ सम्म नेपाल दूरसञ्चार प्राधिकरणलाई फ्रिक्वेन्सी दस्तुर, ग्रामीण दूरसञ्चार विकास कोष तथा रोयल्टीमार्फत् क्रमश: ८ अर्ब ६६ करोड ४० लाख ६१ हजार, ९ अर्ब ४६ करोड ८७ लाख ९३ हजार, ८ अर्ब ७३ करोड ९३ हजार, ९ अर्ब ८२ करोड ६२ लाख १७ हजार तथा ९ अर्ब २ करोड ८० लाख ६५ हजार, रुपैयाँ दाखिला गरेका छन्।
यस्तो छ पाँच वर्षको तालिका
२०७२/७३ | २०७३/७४ | २०७४/७५ | २०७५/७६ | २०७६/७७ | |
फ्रिक्वेन्सी दस्तुर | २३४१२.६१ | ३०७९१.३० | २३०१३.४५ | ३८७६३.०६ | ३७२९९.८० |
आरटीडीएफ | २०१५९.२९ | २०६४०.०० | २२५९९.०२ | २००३६.६२ | १७६६८.५९ |
रोयल्टी | ४३०६८.७१ | ४३२५६.६३ | ४१६८८.४६ | ३९४६२.५० | ३५३१२.२७ |
जम्मा | ८६६४०.६१ | ९४६८७.९३ | ८७३००.९३ | ९८२६२.१७ | ९०२८०.६५ |
*सबै रकम लाखमा